Үндэсний цэцэрлэгт хүрээлэнгийн баруун хэсгийн төв хаалга нь 12 метр өндөр, 8 баганаас бүрдэх Монголд анх удаа хийгдсэн, архитектурын өвөрмөц шийдэл бүхий, гүн бэлгэдэл утгыг агуулсан байгууламж юм.
               
    Уг хаалгыг Нийслэлийн хөрөнгө оруулалтын газрын захиалгаар, анхны эскиз санааг туршлагатай, нэр хүндтэй, чадварлаг архитектор Д.Дуламсүрэн гаргаж, мэргэжлийн чадварлаг байгууллага болох МУ-ын мэргэшсэн хот төлөвлөгч архитектор М.Батбаяр захиралтай “Идеал групп” ХХК зураг төслийг хийж, байгууламжийг барьж гүйцэтгэх ажлыг архитектор Д.Жигжидсүрэн захиралтай ландшафт тохижилтын туршлагатай,  мэргэжлийн байгууллага “Гарден Сити” ХХК 2016 оны 4-р сарын 20-с 6-р сарын 20-ны өдөр хүртэлх хугацаанд гүйцэтгэж, ашиглагч байгууллага Үндэсний цэцэрлэгт хүрээлэнд хүлээлгэн өгсөн.


               
   Ландшафтын төлөвлөлтийг урлагийн бүтээлд тооцож болох бөгөөд түүний үндсэн чиг үүрэг нь газар орны байгалийн үзэмж, хүмүүсийн оршихуйн хүрээлэн буй орчны өнгө төрхийг бүтээн цогцлоож, өвлүүлэн үлдээхэд оршдог. Тав тухтай байдлыг бий болгохын тулд юуны өмнө хот суурин газрын хүн амын хэрэгцээ сонирхлыг уялдуулан, тухайн нутгийн хүрээлэн буй орчин, цаг хугацааны үл давтагдах байдал, ажил амьдралын тайван орчинг байгалийн үзэмж, дуу чимээгээр баяжуулснаар тавлаг орчныг бүрдүүлж болно. Ландфашт гэдэг нь газрын гадарга дээрх цогц төлөвлөлт юм.
               
   Уул, ус, загас, цэцэг зэргийг дүрслэн анх үүссэн түүхэн гарвалтай хээ угалз нь аливаа ард түмний дүрслэх урлагийн онцлог, гоо зүйн болон өнгө хэлбэрийн ойлголт, ан амьтан ургамал, байгаль орчноо дүрсэлж байсан үндэсний өвөрмөц дүрслэл болж байдаг билээ. Тийм ч учраас Үндэсний цэцэрлэгт хүрээлэнгийн хоёрдугаар орц хэсгийн энэхүү хаалганы загварыг “Мөнхийн цагаан уул” цэцгээс сэдэвлэн 8 баганыг нь чимэглэж, цэцгэн хээг багана тус бүрт таслан оруулсан нь хоосон орон зайд ч үргэлжилж, тасралтгүй “мөнх үргэлжилнэ” гэсэн санааг сэтгэлгээний урлагийн илэрхийллээр гаргасан бие даасан бүтээл юм.

               
   Энэ талаар МУ-ын мэргэшсэн хот төлөвлөгч архитектор М.Батбаяр маань, “Хаалга бол дотор байгаа зүйлийнхээ утга учир, сүр хүчийг илэрхийлэгч байх ёстой. Тэр ч утгаараа цэцэрлэгт хүрээлэнг олон зуун жилээр оршин тогтнож, хотын өнгө үзэмжийг гоёмсог байлгаж, оршин суугчдад цэвэр агаар, амарч зугаалах тав тухтай орчныг бэлэглэж, хүссэн бүхэнд үргэлж нээлттэй байг хэмээн бэлгэдэж Монголчууд бидний дээдэлдэг Мөнхийн цагаан уул цэцгийг уг хаалганд гол агуулга болгон уусгаж, миний бие энэхүү санааг гаргасан” хэмээн ярьсан юм.
               
   Энэ нь хаалга гэхээр л дээгүүрээ битүү, заавал хаагдаж, нээгдэж байх ёстой гэсэн тогтсон сэтгэлгээг өөрчилсөн бүтээл болсон. Арвин туршлага, өндөр ур чадвар, хийж бүтээсэн ажил үйлсээрээ салбартаа хэдийнэ танигдсан архитектор Д.Дуламсүрэнгийн гаргасан энэ санаа гайхалтай өвөрмөц байсан. Хэрвээ төсөв мөнгө нь дутуудсан асуудал тулгараагүйсэн бол илүү гоё сайхныг, төгс бүтээл хийх чадвар нь манай мэргэжилтнүүдэд бий гэдэгт эргэлзэх зүйл алга. Зураг төслийг гүйцэтгэсэн “Идеал групп” ХХК нь томоохон төслүүд дээр ажилласан чадварлаг удирдлагатай, туршлагатай байгууллага юм.


               
   Байгууламжийг барьж гүйцэтгэхэд материалын сонголтоос эхлээд дуусах хүртэлх бүх хугацаанд захиалагч, автор, зохиогч, гүйцэтгэгч, ашиглагч талууд болон инженерүүд саналаа байнга солилцож, зөвлөлдөж, хамтын бүтээлээ үр дүнтэй, санасан бодсон шигээ бүтээл болгох гэж сэтгэл зүтгэл гарган ажилласныг онцлох ёстой. Манай улсад урьд нь ийм төрлийн байгууламж хийгдэж байгаагүйгээс зохиогч, гүйцэтгэгч талууд шийдэл тус бүр дээр ярилцах шаардлага гарч байсан юм. Энэ нь анхны бүтээл тул дараа дараагийн бүтээлд илүү сайжруулах зүйл ч байгаа байх.
               
   Архитекторууд маань цаг зав муутай ч, гэрэлтүүлэг сонгохын тулд Улаанбаатар хотын өнцөг булан бүрээс цуглаж, 7 хоног дараалан шөнө болгон 23 цагаас үүрийн 3 цаг хүртэл гадаа зогсож турших зэргээр сэтгэлээсээ хамтран ажиллаж байсан нь бахархалтай байлаа.

 
    Тус хаалганы ерөнхий их биеийг цутгамал төмөр бетон суурь дээр босоо гол труба бэхэлж, түүнд угольник төмрүүдийг зангидан босгож, бат бөх, хөнгөн бүтэцтэй, гоёлын хөнгөн цагаан торон хавтан /wall decoration/-гаар өнгөлж, гадна байх зориулалттай, гэрэлтдэг акрил хуванцрыг хэлбэрт оруулан товойлгож “Цагаан уул” цэцгийн дэлбээг хийж, олон тооны Лед гэрэлтүүлэгчээр чимсэн. Тохирох материалын судалгааг хийж, олон газраар эрэл хайгуул хийж, 10 хоногийн турш үйлдвэрлэгчидтэй уулзсаны эцэст сонголтоо хийсэн юм.
               
   Энэхүү хаалгыг барьж гүйцэтгэсэн нь манай хамт олны хувьд шинэ зүйлд суралцаж, туршлага хуримтлуулсан онцлох бүтээл болж, цаашид уран сэтгэмжтэй, нарийн шийдэл бүхий барилга байгууламжийг бүтээн босгох эхлэлийг тавьсан. Хамтран ажилласан архитекторууд, инженер техникийн ажилтнууд, мөн хотын ихэнх иргэдийн амралт чөлөөт цагаа өнгөрүүлдэг цэцэрлэгт хүрээлэнг гоёмсог сайхан хаалгатай болгоход анхаарч ажилласан Нийслэлийн хөрөнгө оруулалтын газар болон Үндэсний цэцэрлэгт хүрээлэнгийн хамт олонд талархал илэрхийлье.

Аливаа ажлыг хийхэд бухимдах, сандрах зүйл гардаг ч, ард нь гарсны дараах мэдрэмж үнэхээр сайхан шүү.

“Гарден Сити” ХХК захирал Д.Жигжидсүрэн

Улаанбаатар хот, Чингэлтэй дүүрэг, 5-р хороо, Чимэг төв
Утас: 89001898, 88011008
И-мэйл: duudlaga@yahoo.com