Энэ жил барилгын салбар үүсч хөгжсөний 90 жил тохиож буй. Монгол Улсад барилгын салбар албан ёсоор хөгжсөн гэж үзэх 1926 оноос хойших бүтээн байгуулалт тухайн үеийн Монголчуудын ой тойнд төсөөлөгдөөгүй өнөөгийн хөгжил, дэвшил, нөр их бүтээн байгуулалт Социалист нийгэмд аль хэдийн дүр төрхөө олсон юм. Энэ нийгмийн үед бий болсон аж үйлдвэрлэл, барилга, зам тээвэр, дэд бүтцийн суурин дээр бид өнөөдөр амьдарч, ажиллаж буй. Тэгвэл ардчилсан нийгэм тогтсон, чөлөөт тогтолцоо бий болсон энэ 20 гаруй жилийн хугацаанд хойч үед ч дурсагдан үлдэх “Шинэ цагийн бүтээн байгуулалт” гэж нэрлэвэл зохих байгууламжуудыг онцолж байна. Ингэхдээ зөвхөн бодит бүтээн байгуулалт болон хөрсөнд буусан томоохон, онцлох ажлуудыг дурдлаа.



Төрийн ордон-“Төрийн ёслол хүндэтгэлийн өргөө” цогцолбор

2001 онд Монгол Улсын Ерөнхийлөгч Н.Багабанди Их Эзэн Чингис хааны мэндэлсний 840 жилийн ой, Их Монгол Улсын тулгар төр байгуулагдсаны 800 жилийн ойг орон даяар төрт ёсны их баяр болгон тэмдэглэх тухай зарлиг гаргасан. Үүний хүрээнд “Төрийн ёслол хүндэтгэлийн өргөө” цогцолбор шинээр байгуулж, Монгол төрийн ордны нэгэн цогцолбор болгон төрийн ордны урд талд залгаж байрлуулахаар төлөвлөжээ. Хөшөө баримлын эх загварыг урлагийн гавьяат зүтгэлтэн Л.Болд зохиож, Монголын урчуудын эвлэлийн холбооны уран бүтээлчдийн хамт урлан бүтээсэн байна.



Салхит цахилгаан станц

“Салхит салхин цахилгаан станц” нь 50 мВт-ын суурилагдсан хүчин чадалтай, манай улсын сэргээгдэх эрчим хүчний салбарын хөгжилд нэгэн шинэ хуудас нээж байгаа бөгөөд эх дэлхийгээ цэвэр, тогтвортой хөгжүүлэх хүчин чармайлтад Монгол Улсын оруулж буй анхны бодит хувь нэмэр юм. Салхин станц нь Женерал Электрик компанийн 1.6 МВт-ын хүчин чадалтай 31 салхин турбин үүсгүүрээр тоноглогдсон. Жил бүр хүлэмжийн хийн ялгарлыг 180 мянган тонноор бууруулахаас гадна 1.6 сая тонн цэвэр ус болон 122 мянган тонн нүүрсийг хэмнэнэ. Салхит салхин цахилгаан станцын ерөнхий гүйцэтгэгч “Лэйтон” ХХК бөгөөд дотоодын барилга угсралт, инженерийн 18 компани оролцон ажиллаж, барилга угсралтын ажлын оргил үед төслийн талбайд 500 гаруй хүн оролцсоны 94 хувь нь Монгол ажилчид байжээ.



“Чингис хаан” олон улсын нисэх онгоцны шинэ буудал

Улаанбаатар хотын ойролцоо Төв аймгийн Сэргэлэн сумын Хөшигийн хөндийд олон улсын шинэ нисэх онгоцны буудал барих төслийг Монгол Улсын Ерөнхий сайд М.Энхболд 2006 оны 3 дугаар сард Япон Улсад албан ёсны айлчлал хийх үедээ анх тус улсын Засгийн газарт санал болгосон. Одоогоор төслийн хэрэгжилт 2016 оны 8 дугаар сарын байдлаар 93.1 хувийн гүйцэтгэлтэй байна. Барилгын хэмжээ 117м:138м, 3 давхар нийт талбай 37000 кв, ган болон төмөр бетон хийцтэй. Жилд 3 сая зорчигч, 22000 агаарын хөлөг хүлээн авах хүчин чадал бүхий 6 хүзүүвчтэй. Цаашид 20 хүртэл хүзүүвчтэй байхаар өргөтгөх боломжийг тооцож гаргасан.



Буянт-Ухаа 1,2 хороолол

Үндэсний Бүтээн Байгуулалтын Корпораци нь “Буянт-Ухаа 1 болон 2” цогцолбор хорооллын төсөл дээр гүйцэтгэгчээр ажиллаж байна. Буянт-Ухаа 1 хороолол нь ХУД-ийн 9-р хорооны нутаг дэвсгэрт 1575 айлын орон сууц, 120 хүүхдийн цэцэрлэг, 380 кв.м талбай бүхий үйлчилгээний төвтэй. Тус хорооллын бүтээн байгуулалт нь хурдтай гүйцэтгэл, чанарын үзүүлэлтээрээ манай улсын барилгын салбарт шинэ амжилтын хуудсууд нээсэн байна. 
"Буянт-Ухаа 2" төсөл нь Хан-Уул дүүргийн 2-р хорооны нутаг дэвсгэрийн нийт 28 га газарт 54 айлын 9 давхар орон сууцны барилга 48 ширхэг, 12 давхар орон сууцны 60 ширхэг барилга баригдаж байна. Хүүхдийн цэцэрлэг 4 ширхэг, ерөнхий боловсролын сургууль 2 ширхэг, нэгдсэн авто машины 7 давхар граж, 16*16 хэмжээтэй 12 ширхэг үйлчилгээний төв зэрэг барилгууд баригдаж байна.



Чингис хааны хөшөөт цогцолбор

Чингис хааны хөшөөт цогцолбор нь Улаанбаатар хотоос 54 км зайд байгалийн сайхан цогцолсон Туул голын ойролцоо Төв аймгийн Эрдэнэ сумын нутаг Цонжин болдог хэмээх түүхэн үйл явдалтай холбоотой газарт байрладаг. Цогцолборын төвд баруун гартаа алтан ташуур тулж, наран ургах зүгт алсын бараа харсан 40 метр өндөртэй Чингис хааны морьт хөшөө байрлана. Морьт хөшөө нь 250тн ган хуудсаар хийсэн 30 метр өндөртэй үндсэн хэсэг, 10метр өндөртэй 36метрийн диамертэй суурийн байгууламжаас бүрдэнэ. Тус цогцолборын ерөнхий архитектороор Д.Эрдэнэбилэг ажилласан бөгөөд цогцолбор албан ёсоор 2008 онд нээлтээ хийсэн. Эргэн тойронд нь орчин үеийн техник технологийн хөгжлийг харуулсан зочид буудал бүхий 200 гэрүүд байгуулж, гольфын талбай, задгай театр, хиймэл нуур, спортын талбайнууд байгуулан 10 мянган мод тарих ажээ.



Үндэсний цэцэрлэгт хүрээлэн
 
Хорин хоёр төрлийн 94 мянга гаруй мод, буттай, зүлэг, цэцэгтэй, усан оргилуур, хүүхдийн тоглоомын талбай, дугуйн парк гээд амралт зугаалгын ая тухыг хангасан “Үндэсний цэцэрлэгт хүрээлэн” эзгүй тал дээр бүтээн байгуулагдсан юм.
Бүрэн ашиглалтад орох үедээ 1280 га талбайг хамрах энэ хүрээлэн Улаанбаатар хотын нийт ногоон байгууламжийн 23 хувийг дангаар эзэлж байгаа аж.
 


Зайсан соёл амралтын цогцолбор

Зайсан толгойн энгэрт сүндэрлэх “Оюуны ундраа групп” ХХК-ийн бүтээн байгуулж буй Зайсан соёл амралтын цогцолборт Үндэсний түүх соёлын үзмэр, Угсаатны зүйн музей, Уран зургийн галерей, Кино театр, Концертын танхим, Гэрлэх ёслолын танхим, Олон үндэстний зоогийн газар, Хүүхдийн тоглоомын төв, Задгай театр, Мөсөн гулгуурын талбай, хурлын танхим, худалдаа үйлчилгээний төв зэрэг хүн бүрийн амралт, чөлөөт цагаа зөв боловсон өнгөрүүлэхэд шаардлагатай бүхий л үйлчилгээг нэг дор цогцлоож байна.



“Скай Резорт” цогцолбор

Скай Резорт цогцолбор нь 2009 онд нээлтээ хийсэн бөгөөд 100 хувь Монгол хүмүүс үйл ажиллагааг явуулж байна. Ерөнхий зураг төслийг Францын “МАС Лимитэд”, цас хийх системийг Италийн “Техно Алфин” компаниуд тус тус хийж гүйцэтгэсэн олон улсын стандартын цанын баазад уулын болон гүйлтийн цана, сноубоардын замтай. 



"Viva city" залуусын хороолол

“MSC property” ХХК-ийн “Viva city” бүтээн байгуулалт нь эзгүй тал байсан газрыг өнгө үзэмж оруулаад зогсохгүй их хотын чимэг болж чадсан газар юм. Тус орон сууц нь талбайг ухаалгаар ашиглан бага м2 зайд ихийг багтаасан, 1614 айлын орон сууцнаас бүрдэнэ. Нийт өртөг 97 тэрбум төгрөг.