Монголбанкны Ерөнхийлөгчийн А-295 тоот тушаал өнгөрсөн сарын 25-ны өдөр орон сууцны ипотекийн зээлийн санхүүжилтийн журмыг шинээр баталсан.

Шинэ журмаар, Ипотекийн зээлийн санхүүжилтийг Монголбанкны мэдэлд буй Ипотекийн зээлээр баталгаажсан бондын эргэн төлөлт, купоны төлбөрөөс санхүүжүүлэхээр болсон байна.​ Өөрөөр хэлбэл, тухайн сардаа хэдий хэмжээ эргэн төлөлт хийгдэнэ, тэр хэмжээгээр санхүүжилт хийгдэх гэнэ. Ингэхдээ Монголбанк тухайн сард олгох ипотекийн зээлийн эх үүсвэрийн дээд хэмжээг тухайлсан банк бүрд мэдэгдэнэ. Энэ дагуу банкууд зээлийн шийдвэрээ гаргаж, өөрийн эх үүсвэрээр ипотекийн зээлийг олгосны дараа Монголбанк санхүүжилтийг олгох аж. Харин энэ удаад 35,8 тэрбум төгрөгийн санхүүжилт хийгдсэн байна.
 
Үүнтэй холбоотойгоор Хаан банкнаас тодруулахад, зургаадугаар сараас ч өмнөх сарын санхүүжилт ороогүй байна гэж байлаа. 

Энэ хариултын дагуу Монголбанкнаас тодруулбал, “Шинэ журам батлагдаж, өнгөрсөн долоо хоногт банкнууд руу 35,8 тэрбум төгрөгийг шилжүүлсэн. Энэ нь долоо болон наймдугаар сарын зээлдэгчдийн зээлийг шийдвэрлэж байгаа бөгөөд дараа дараагийн саруудын мөнгийг олгохоор ажиллаж байна. Хаан банкны тухайд, тухайн банкны дотоод үйл ажиллагааг бид мэдэхгүй. Ямагтай ч санхүүжилт орсон” гэлээ.
 
Дахин хэлэхэд, цаашдаа Монголбанк урьдчилж ямар нэгэн байдлаар санхүүжилт хийхгүй, сар тутамд санхүүжилт орно.

Мөн шинэ журмаар зээлдэгч ипотекийн ямар нэгэн хөнгөлөлттэй зээлийн үлдэгдэлгүй байхаар зохицуулагджээ.
 
Харин орон сууцны метр квадрат болон урьдчилгаанд өөрчлөлт ороогүй бөгөөд хугацаа 30 хүртэлх жил, урьдчилгаа төлбөр 30 хувиар 80 ам.метрээс ихгүй байх шийдвэр хэвээр үргэлжлэх аж.

Шинэ журмаас Онцлох нөхцлүүдээс нь дурдвал:

• Орон сууцны ипотекийн зээлийн хугацаа 360 хүртэл сар байна
• Зээлийн хүү жилийн 8 хувь
• Урьдчилгаа төлбөр 30 хувиас доошгүй /Зээл үнэлгээний харьцаа хөрөнгө 70 хувиас дээшгүй/
• Өр орлогын харьцаа өрхийн татварын өмнөх орлого 45 хувиас хэтрэхгүй
• Худалдан авах нийтийн зориулалттай орон сууцны талбайн нийт хэмжээ 80м2-аас ихгүй зэрэг заалт тусгагджээ. /Дэлгэрэнгүй мэдээллийг дор үзүүлсэн журмаас харна уу. 

Монголбанкны Ерөнхийлөгчийн 2016 оны аравдугаар сарын 25-ны тушаалаар батлагдсан Орон сууцны ипотекийн санхүүжилтийн шинэ журамтай танилцана уу.