Өчигдөр Төрийн ордонд УИХ-ын Нийгмийн бодлого, боловсрол, соёл, шинжлэх ухааны байнгын хороо, Байгаль орчин, хүнс, хөдөө аж ахуйн байнгын хороо хамтран “Ариун цэврийн байгууламж-Нүхэн жорлон” сэдэвт нээлттэй хэлэлцүүлэг зохион байгуулжээ.

Нийслэлийн 2015 оны статистик мэдээллээр, Улаанбаатар хот нийт 1.345.500 хүн ам, 376.419 өрх байгаа аж. Үүнээс орон сууцанд 157.754 өрх, гэр хороололд 218.665 өрх амьдарч буй бөгөөд гэр хорооллын дээрх өрхүүд 100 мянга гаруй нүхэн жорлон ашиглагдаж байгааг Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр мэдэгдэв.

Мөн ШУТИС-ийн профессор Д.Басандорж илтгэлдээ, "Нүхэн жорлон дахь өтгөн, шингэнийг бохир гэж харахаас илүүтэй дахин ашиглах нөөц, эдийн засгийн эргэлтэд оруулж болох “баялаг” гэдэг талаас нь хандах цаг ирсэн. Тухайлбал, олон улсад төдийгүй манай улсын эрдэмтэн судлаачдын туршиж, хэрэгжүүлж байгаа хэд хэдэн технологийн шийдэл, гарцыг ашиглан өтгөн, шингэнийг дангаар нь болон үнс, нүүрстэй хольж, бордоо хийх, био хий, био гэрэл, био цахилгаан үйлдвэрлэх бололцоотой" хэмээн дурдлаа.


       























                Хэлэлцүүлгийн үеэр хөндөгдсөн бас нэг асуудал нь орон нутгийн цэцэрлэг, сургуулийн ариун цэврийн байгууламжийг сайжруулах байв.

БСШУСЯ-наас 2015 онд 12 аймгийн 24 цэцэрлэгийн барилгыг 19 тэрбум төгрөгөөр, 6 аймгийн 12 сумын дотуур байрыг 5 тэрбум төгрөгөөр, 8 аймгийн 9 сургуулийг 20 тэрбум төгрөгөөр, 2016 онд 10 аймгийн 11 цэцэрлэгийг 22.2 тэрбум төгрөгөөр, 6 аймгийн 7 сумын дотуур байр, 9 аймгийн 13 сургуулийг шинээр барьж, ашиглалтад оруулсан бөгөөд ариун цэврийн байгууламжийг иж бүрэн шийдсэн байна. Гэвч үлдсэн нийт 669 цэцэрлэг, сургуулийн 160.100 хүүхдийн шаардлага хангасан ариун цэврийн байгууламжийг байгуулахад 70.2 тэрбум төгрөг шаардлагатай байгааг Боловсрол, соёл, шинжлэх ухаан, спортын яамны Төрийн нарийн бичгийн дарга Б.Баярсайхан хэллээ.

Эцэст нь УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга Л.Энх-Амгалан төрийн болон төрийн бус байгууллага, эрдэмтэн судлаачдын санал санаачлагыг УИХ-ын зүгээс дэмжиж, хамтран ажиллахаа мэдэгдсэнээр хэлэлцүүлэг өндөрлөв.