Хэрэв та байшиндаа засвар хийх гэж байгаа бол дулаалгатайгаа хамт хийх нь ашигтай. Мөн санхүүгийн боломждоо тааруулан байшингийнхаа хойд талын эсвэл булангийн өрөөний гадна ханыг эхэлж дулаалах гэх мэтээр хэсэгчлэн дулаалж болно. Ханын дулаалгыг олон янзаар хийж болно.

ГАДНА ДУЛААЛГА
 
-Агаар сэлгэлтийн үетэй гадна талын дулаалга
Эрдэс хөвөн эсвэл хатуу хөөсөнцөр хавтанг хананд урьдчилан бэхэлсэн 5см-ын брусыг хооронд хийж дээрээс нь хөндлөн чиглэлд дахин брус хадаж, гадаргуугийн өнгөлгөөний материалаа тогтооно. Ингэхдээ дулаалгын болон гадаргуугийн өнгөлгөөний материалын хооронд 2см орчим зузаан агаар сэлгэлтийн зай гаргана. Гадаргуун өнгөлгөөг ховилтой банз, шифр, металл болон хуванцар хавтангаар хийж болно.
 
-Шавардлагатай өнгөлгөөтэй дулаалга
Энэхүү дулаалга нь тэгш гадаргуутай тоосго ба бетонон ханатай байшинг дулаалахад тохиромжтой. Хатуу хөөсөнцөр эсвэл эрдэс хөвөн хавтанг ханын тэгшилж бэлдсэн гадаргуу дээр цавуут зуурмагаар (плитаны цавуутай ижил) наана. Ханын гадаргуу нь гэмтэлгүй, бат бэх, барьцалдалт сайтай байх ёстой. Дараа нь дулаалгын хавтан дээр полипропилен (хуванцар материал) тор бүхий цавуут зуурмагаар шавардлага хийж, шаардлагатай бол хуванцар тэлэгчтэй дюбель хадаасаар нэмэлт бэхэлгээ хийнэ. Дээр нь өнгөт шавардлага хийх буюу эсвэл зориулалтын фасадны будгаар будна. Манай орны нөхцөлд цайвар өнгийг сонговол нарны гэрэлд халахгүй ба ингэснээр шавардлагын гадаргуу хагарахгүй сайн талтай. Энэ нь бусад гадна дулаалгын хувилбаруудаас хамгийн хямд нь юм. Энэ ажлыг гүйцэтгэхдээ туршлагатай мэргэжлийн байгууллагаас зөвлөгөө аваарай.

-Тоосгон өнгөлгөөтэй дулаалга
Ийм төрлийн дулаалгыг одоо байгаа барилгын гадна талд 12см-ийн тоосгон ханан өнгөлгөө хийх үед хэрэглэдэг. Хөөсөнцөр эсвэл эрдэс хөвөн дулаалгын хавтанг үндсэн хананд зай завсар гаргалгүй бэхэлж тогтооно. Арван хоёрын тоосгон ханыг өрөх явцад түүнийг зориулалтын, дулаалгын үеийг нэвт гарсан зэвэрдэггүй эсвэл цайрдсан анкер төмрөөр үндсэн ханатай холбож явна. Үндсэн хана нь дүнз бол тухайн ханын суултад ордог онцлогийг харгалзан энэхүү бэхэлгээг босоо шилжилт саадгүй байхаар гүйцэтгэх хэрэгтэй.




ДОТОР ДУЛААЛГА
 
Дотор талын дулаалгын ашигтай талууд:
• Зардал багатай;
• Үе шаттайгаар, алхам алхмаар хийх боломжтой;
• Хувь хүн өөрөө хийхэд төвөг багатай;
• Дулаалга нь гадна цаг агаарын нөлөөлөлд өртөхгүй;
• Байшингийн гадна өнгө төрхийг эвдэхгүй;
• Дотор дулаалгатай өрөө маш түргэн хална;
 
Анхаарах зүйл гэвэл, өрөөний доторх хэмжээ багасаж, нэлээд хэдэн нэмэлт ажил гарах ба ийм хананд юм тогтооход бэрхшээлтэй. Дотор дулаалгад эрдэс хөвөн хавтан ашиглаж байгаа бол эрүүл ахуйн болон уур тусгаарлах үүднээс полиэтилен плёнкоор нэлэнхийд нь бүрэх хэрэгтэй. Дотор дулаалга нь цуллаг, жин ихтэй гадна ханын дулаан барих чадварыг “үгүй” болгож байгаа боловч, хэрэв дотор хана, хучилт, шал зэрэг хийц нь хүнд, дулаан сайн хадгалдаг материалаар хийж байгаа бол энэ нь төдийлөн ач холбогдолгүй.
 
Дотор дулаалга хийхэд гарах зарим хүндрэл :
• Халаах хэрэгслийн болон халаалтын яндан хоолойн ард дулаалга хийх;
• Цахилгааны угсралтыг өөрчлөх, шинэчлэн угсрах;
• Цонх, цонхны тавцангийн орчмын дулаалга;
- Тортой шавардлага бүхий дулаалга
- Дотор талаас хийх дулаалга

Дотор дулаалга нь гадаргуун жигд дулаалга болж чаддаггүй, ялангуяа хана, хучилт, дотор ба гадна ханын уулзвар хэсгээр алдах дулааны урсгалыг хааж чаддаггүй.
 
-Зоорийн давхрын дулаалга
Зоорийг муу дулаалсан эсвэл дулаалаагүйгээс болж шалаар багагүй дулаан алдагддаг. Иймээс зоорийн давхрын ханыг гадна ханын адил дулаалах хэрэгтэй. Хүйтэн зоорийн давхартай бол нэгдүгээр давхрын дулааны алдагдлыг багасгахын тулд зоорийн хучилтыг доороос нь дулаалахад хангалттай. Ингэхийн тулд 5см-ээс багагүй зузаантай хатуу хөөсөнцөр хавтанг зориулалтын цавуугаар (плитаны цавуу) нааж тогтооно.
Хэрэв таны байшин зоорийн давхаргүй бол шалаа дулаалахын тулд түүнийг хөндөлгүйгээр дээрээс нь нэмж дулаалан давхар шаллах нь арай хялбар байх болно. Ингэж хийх тохиолдолд хаалганы самбаруудыг доороос нь тайрч хасах ажил гардгийг анхаараарай.