Ард иргэдийнхээ амгалан тайван, тав тухтай, аюулгүй амьдрах орчныг хангахын тулд халуунд халж, хүйтэнд хөрж, цаг наргүй ажиллаж байдаг Нийтийн аж ахуйн салбар үүсгэн байгуулагдсаны 85 жилийн ойн баярын хурал боллоо.

     Нийтийн аж ахуй, ахуйн үйлчилгээний хүртээмжийг сайжруулах, орон сууцны фондыг нэмэгдүүлэх зорилтыг дэвшүүлэн, БНМАУ-ын Засгийн газрын 1931 оны Нэгдүгээр тогтоол гарснаар манай улсад энэ салбар үүсгэн байгуулагдсан он тооллын хуудас эхэлсэн байдаг.

     Анх байгуулагдсан цагаас өнөөг хүртэл тус салбарт гарсан ахиц дэвшил, өөрчлөлт, хийж бүтээсэн ажлыг дүгнэн хэлэлцсэн тус хуралд УИХ-ын дарга М.Энхболд мэндчилгээ илгээж, БСШУС-ын сайд, НААХолбооны тэргүүн Ж.Батсуурь, БХБ-ын дэд сайд Ш.Лхамсүрэн, Төрийн нарийн бичгийн дарга С.Магнайсүрэн, Төрийн захиргааны удирдлагын газрын дарга У.Отгонбаяр, Нийтийн аж ахуйн үйлчилгээний яамны орлогч сайд асан, АҮ-ийн Гавьяат ажилтан Д.Жигжид, НААҮ-ний Гавьяат ажилтан Ц.Баасанжав, НААҮЯ-ны орлогч сайд асан Г.Норжинлхам, С.Отгонбор, НААҮ-ний Гавьяат ажилтан Я.Өлзийбат нар хурлын хүндэт зочдоор оролцож, салбарынхандаа мэндчилгээ дэвшүүлж, салбарын одоогийн байдал, тулгамдаж бэрхшээл, цаашид хэрэгжүүлэх шаардлагатай байгаа зарим асуудал дээр санал бодлоо хэллээ.

Тухайлбал, БХБ-ын дэд сайд Ш.Лхамсүрэн хэлсэн үгэндээ:

Салбарт одоогийн нөхцөл байдлыг сайжруулах үүднээс техникийн шинэчлэлт хийх, шинжлэх ухаан мэдээллийн технологийн хөгжлийг бүтээлчээр ашиглах, салбарын шинэчлэлтийг олон улсын түвшинд хэрэглэгдэж буй дэвшилтэт технологиудыг нэвтрүүлэхэд анхаарах, цэвэрлэх байгууламжийн лагийг бүрэн боловсруулж дахин ашиглах технологи нэвтрүүлж, байгаль орчныг бохирдлоос хамгаалах, хүн амын орон сууцны хэрэгцээг хангах нэгдсэн бодлого боловсруулж загвар төсөл хэрэгжүүлж ажиллана гэдгээ онцолсон юм.

Дэд бүтцийн сайд, НААҮЯ-ны орлогч сайд асан Б.Жигжид хэлсэн үгэндээ:

Усыг үнэгүйдүүлж, хий дэмий урсгаж байгааг таслан зогсоох ёстой. Бид олон улсын хэмжээнд өргөн ашиглагдаж эхэлсэн технологийн дэвшлүүдийг Нийтийн аж ахуйн үйлчилгээний салбартаа нэвтрүүлж, алхам бүртээ ус, байгалийн нөөц баялгаа хэмнэж, ажлыг хөнгөвчилсөн орчин үеийн шийдэлд бүрэн шилжих ёстой. 85 насны ойг та бүхэн “85 настай” өвөө, эмээ биш найман настай хүүхдийн төрсөн өдрийн баяр ойлгоорой. Энэ салбартаа түүхийг бүтээлцсэн ахмадууд, ажил үйлсээрээ холбогдсон залуустаа, өнөөдөр энд хуран цугласан инженер техникийн ажилтнууддаа хамгийн сайн сайхныг ерөөж, санасан бүхэн нь биелж байх болтугай хэмээн ерөөл өргөе.


 Үндэсний язгуур урлагийн тоглолт, ардын бүжгийн үзүүлбэрээр үргэлжилсэн баярын хуралд Нийтийн аж ахуйн салбарт харъяалагдах байгууллагуудын залуус мэндчилгээ дэвшүүлж, урлагийн тоглолтуудаа хүргэлээ.