Монголын Архитекторуудын Эвлэлийн 60 жилийн ойн баярыг тохиолдуулан Монголын төр, нийгмийн нэрт зүтгэлтэн, барилга архитектурын салбарт үнэтэй хувь нэмрээ оруулсан Дамдинжавын Майдар агсны мэндэлсний 100 жилийн ойд зориулсан үзэсгэлэн өнөөдөр нээгдлээ.

    Тус эвлэл байгуулагдахад энэ эрхэм хүний гүйцэтгэсэн үүрэг, их барилгын салбарыг 25 жил удирдсан ажил үйлсийг нь мөнхлөн, залуу хойч үедээ таниулах үүднээс ийнхүү түүний ажил үйлс, амьдрал ахуйтай холбоотой гэрэл зургуудаар үзэсгэлэн гаргаж, Монголын ахмад, дунд болон залуу архитекторуудыг оролцуулсан хурлыг зохион байгуулсан юм. Хурлын өмнө Д.Майдар агсны гэр бүлийнхэн түүний ном, бүтээлүүдийг МАЭ-д гардуулсан юм.





МАЭ-ийн Ерөнхийлөгч Э.Хүрэлбаатар:



Өнөөдөр МАЭ байгуулагдсаны 60 жилийн ойн арга хэмжээ болж буй бэлгэ дэмбэрэлтэй өдөр тохиож байна. Ойн баярын хүрээнд Монголын Архитекторуудын эвлэлд гүйцэтгэсэн түүхэн үүрэг хариуцлагыг нь үнэлж хүндэтгэн, их барилгын салбарыг 25 жил удирдан ажилласан Д.Майдар агсны мэндэлсний 100 жилийн ойд зориулан үйл хэргийг нь залуу үеийнхэнд танилцуулах үзэсгэлэн, хурлын арга хэмжээг зохион явуулж байна.

Үзэсгэлэнг Д.Майдар агсны үр хүүхэд, төрөл төрөгсөд, МАЭ-ийн Удирдах зөвлөлөөс хамтран зохион байгуулж байгаа. Энэхүү үзэсгэлэнгийн өдрүүд өндөрлөх үеэр эд зүйлсийг нь түүний төрөлх Дорнод аймгийн Нутгийн зөвлөлд хүлээлгэн өгөх юм. Түүнийг барилга, хот байгуулалтын салбарыг хөгжүүлэхэд онцгой чухал үүрэг гүйцэтгэснийг түүхэнд тэмдэглэн үлдээсэн байдаг. Тиймээс үйл хэргийг нь мөнхжүүлэх, хийж хэрэгжүүлж байсан ажлыг нь залгамжлан үргэлжлүүлэх, хөгжүүлэхийг зорьж энэ чиглэлээр судалгаа, шинжилгээ хийж буй мэргэжилтнүүд илтгэл тавьж оролцож байна.

Д.Майдар агсан архитектор хүн биш. Гэхдээ архитектурын салбарыг хөгжүүлэх, эрхзүйн орчинг бүрдүүлэх, олон улсын хэмжээнд Монголын барилгын салбарыг хөгжүүлэхэд ихээхэн үүрэг гүйцэтгэсэн удирдагч юм. Тиймээс түүний бүтээсэн үйл өнөөдрийн бидний амьдарч байгаа энэ сайн сайхан нөхцөлийг бүрдүүлэхийн төлөө хийсэн зүйл гэдгийг бид онцлон, тэмдэглэж байна.

МАЭ-ийн Дэд ерөнхийлөгч Д.Бат:



МАЭ-ийн 60 жилийн ойг энэ сарын 26-ны өдөр тэмдэглэнэ. Анх энэ эвлэлийг байгуулах, архитекторуудыг сургах, Монголын архитектур хот байгуулалтыг хөгжүүлэхэд гарамгай гавьяа байгуулсан хүн бол Д.Майдар агсан юм. Тиймээс эвлэлийн ойн арга хэмжээний хүрээнд түүний мэндэлсний 100 жилийн ойг тэмдэглэж, цомхон үзэсгэлэн гаргалаа. Д.Майдар гуай барилга, шинжлэх ухааны салбарыг хөгжүүлэх, байгаль орчныг хамгаалах гээд гурван том салбарыг нэгтгэн удирдаж, зохион байгжуулж байсан хүн юм. Монголын анхны архитектор Б.Чимид 1948 онд ЗХУ-д сургууль төгсөж ирснээс хойш Д.Майдар гуай энэ салбарт онцгой анхаарал хандуулж ирсэн.

Тэрээр 1962 онд Москва хотноо болсон Дэлхийн архитекторуудын эвлэлийн хуралд ууган архитектор Б.Чимид нарыг ахалж, ажиглагчаар оролцож байсан. Дараа нь 1963 онд Гавана, Мехико хотод болсон олон улсын их хурлуудад Монголын архитекторуудын төлөөлөгчдийг оролцуулж, МАЭ-ийг Дэлхийн архитекторуудын эвлэлийн гишүүн болгосон түүхтэй. Өдгөө энэ нь дэлхийн 140 гаруй орны 1 сая 400 мянга гаруй архитекторыг нэгтгэсэн том байгууллага болжээ.

1956 онд тэрээр архитекторууд болон бусад мэргэжилтнүүдийг ахлан Европын социалист орнууд дахь архитектур, хот байгуулалттай танилцсан байдаг. Монгол оюутнуудыг зөвхөн ЗХУ-аар хязгаарлахгүй, 1960-аад оноос социалист орнуудад сургаж эхэлсэн. Болгар, Чех, Германд төдийгүй дотооддоо олон ч архитекторыг сургасан. Энэ их ажлыг зохион байгуулахын хажуугаар Монголын архитектур, хот байгуулалтын дурсгалыг судалж, түүхийн ухааны докторын зэрэг хамгаалж, 10 гаруй ном зохиол бичсэн байдаг. Эдгээр бүтээл нь өдгөө манай оюутнууд, барилгачид, архитекторуудын өдөр тутмын гарын авлага, сурах бичиг болон үлджээ.

Энэ мэтчилэн Монголын барилга, архитектурын салбарт оруулсан онцгой хувь нэмрийг нь хойч үедээ таниулахаар гэрэл зургуудаар нь үзэсгэлэн гаргаж, хурал зохион байгуулах зэргээр түүнд хүндэтгэл үзүүлж байна.