2017 оны Барилга, нийтийн аж ахуйн салбарын удирдах ажилтны зөвлөгөөн Төрийн Ордны их танхим дахь хурлаар эхэллээ. Зөвлөгөөнд салбарын төрийн болон төрийн бус байгууллага, аж ахуйн нэгжийн удирдлагуудаас бүрдсэн нийт 600 гаруй хүн оролцож байна.

  Дулааны улирал ирж, барилга бүтээн байгуулалтын их ажил өрнөж буй энэ үед эдийн засгийн хүндрэл бэрхшээлийг даван туулж, орон сууцны ипотекийн зээлийн асуудлаас эхлээд төрөөс баримтлах бодлого, салбарт хийгдэх хөрөнгө оруулалт, бүтээн байгуулалтын ажлуудын талаар салбарын удирдлагууд зөвлөлдөж байгаа юм.

  Мөн энэ үеэр барилгын салбар дахь төрийн үйлчилгээг цахимжуулах, олон улсын стандарт нэвтрүүлэх, улсын төсвийн хөрөнгө оруулалтаар болон гадаадын зээл тусламжаар баригдах барилга байгууламж, төсөл арга хэмжээний чанарыг сайжруулах талаар холбогдох албаны хүмүүс илтгэл тавьж, мэдээлэл өглөө.

Барилга, хот байгуулалтын Сайд Г.Мөнхбаяр:



  Бид томоохон хэд хэдэн төсөл хөтөлбөрийг хэрэгжүүлэх гэж байгаа сайхан мэдээллээр энэхүү зөвлөгөөнийг эхлүүлж байна. Нэгдүгээрт, аймаг орон нутгийн цэвэрлэх байгууламжууд үнэхээр анхаарал татсан асуудал болоод байна. Иж бүрэн шаардлага хангасан цэвэрлэх байгууламжтай аймаг ганц ч алга. Тиймээс энэ онд багтаан аймгуудын 50 хувийнх нь цэвэрлэх байгууламжийг Олон улсын зээл тусламжаар шинэчлэхээр шийдвэрлэсэн. Энэ тал дээр Азийн хөгжлийн банк ихээхэн дэмжлэг үзүүлж байгаад талархаж байна.

  Мөн Улаанбаатар хотын гэр хорооллын агаарын бохирдлын асуудал үнэхээр хүнд байгаа учир дэд бүтцийн шинэчлэлийн хөрөнгө оруулалтыг Засгийн газар хэлэлцэж байгаа. Энэ намраас дорвитой өөрчлөлтүүдийг хийхээр төлөвлөсөн.

  Дэд бүтцийн шугам сүлжээ татах боломжгүй гэр хорооллын бүсүүдэд олон улсын туршлага, технологийн шийдлүүдийг нэвтрүүлэхээр судалж байна. Бусад улс орнуудаад газ буюу хий ашиглан олон асуудлыг шийддэг болсон. Гэтэл манай улсад төсвийн байгууллагууд, ялангуяа хорооны сургууль, цэцэрлэг, зэвсэгт хүчний анги нэгтгэлүүд гэгчлэн нүүрс түлдэг газруудаас энэ ажлыг эхэлнэ.

  Хоёрдугаарт, хотуудын туршлагыг харахад, газрын гүний дулааныг иж бүрэн станц хэлбэрээр шийдэж байгааг Эрчим хүчний яам болон Барилга, хот байгуулалтын яамнаас хамтарсан ажлын хэсэг гарган судалгааны ажлаа эхэлсэн. Энэ мэт технологи, инноваци дээр тулгуурласан шийдлүүдээр тулгамдсан асуудлаа шийдээд явна.

  Ипотекийн зээл зогсохгүй. Олон улсын сангийн валютын хөтөлбөрт ипотекийн зээлийг тусгаж, энэ оны төсөвт 300 тэрбум төгрөгийг суулгасан. Тэгэхээр сард 30-35 тэрбум төгрөгийг арилжааны банкуудаар дамжуулан уг зээлийг санхүүжүүлэх нь Сангийн яамны эрх мэдлийн хүрээнд шийдэх асуудал.

Барилгын хөгжлийн төвийн захирал Ц.Амарсанаа:



  “Барилга, нийтийн аж ахуйн удирдах ажилтны зөвлөгөөн 2017”-д Барилгын хөгжлийн төвийн зүгээс төрийн үйлчилгээг аж ахуйн нэгжүүддээ түргэн шуурхай хүргэж, барилгын салбарын мэргэжлийг цахимжуулах талаар оролцож байна. Манай байгууллага техникийн хяналт, зураг төслийн магадлал, барилгын салбарын мэргэжилтнүүдийн зэрэг дээшлүүлэх сургалтуудыг зохион байгуулдаг.

  Бид зураг төсөлд магадлал хийх ажлыг нэг цэгийн үйлчилгээнд хамруулж, зураг төсөлд хуулийн хугацаанд нь багтаан дүгнэлтийг чанартай гаргаж, магадлал хийх ажлыг гүйцэтгэж байна. Мөн улсын төсвийн хөрөнгө оруулалт, гадны зээл тусламжаар баригдаж байгаа барилга байгууламжуудад хийх техникийн хяналтыг цахим хэлбэрт шилжүүлж, шаардлагатай хүмүүст нь энэ ажил ямар шатандаа явааг түргэн шуурхай хүргэхийг хичээн ажиллаж байна.

Нийслэлийн гэр хорооллын дэд бүтцийн газрын дарга М.Ганбаатар:



  200 айлын дунд баригдах “Сервис центр”-ийн техник эдийн засгийн үндэслэлийг олон улсын шугамаар тодруулах уралдаан зарлаж байгаа. Урьд өмнө ашиглаж байгаагүй жишиг учраас энэ асуудлыг олон улсын түвшинд уралдаан зарлаж шалгаруулалтаар ТЭЗҮ-г хийлгэнэ. Үүнтэй холбогдуулаад нийслэлийн төсөвт эхний ээлжинд 10 хүртэлх “Сервис центр”-ийг барьж байгуулах зардлыг тусгасан. Энэ нь хоёр мянган айлыг “Сервис центр”-т холбох ажлын эхлэл юм. Энэ нь зөвхөн иргэдэд үйлчлэх дэд бүтэц биш, нам давхрын сууцны шугам сүлжээний бэлтгэл ажил учраас энэ ондоо 2-5 давхрын сууцнууд гэр хорооллын бүст олноор баригдаж, ашиглалтад орно гэсэн үг. Одоогоор нам давхрын буюу 2-5 давхрын 10 мянган сууцыг барьж ашиглалтад оруулах тооцоо гаргасан.

  Мөн дахин төлөвлөлтийн хүрээнд дээрх төслийг эрчимжүүлэх ажлыг зохион байгуулж байна. Гэр хорооллын бүст олон га-гаар нь авсан газруудыг шинээр зохион байгуулж, хэсэгчилснээр 112 нэгж талбарт дахин төлөвлөлтийн төслийг эрчимтэй хэрэгжүүлэх, үүнтэй холбогдуулан дөрвөн жилийн хугацаанд 45 мянган айлын орон сууцны ажил эхлүүлэхээр төлөвлөсөн.

  Өнөөдрийн зөвлөгөөнөөр нийслэлээс хийж хэрэгжүүлэх ажлыг БХБЯ-ны бодлоготой уялдуулж, дээрх бүс нутгуудад дэмжлэг авах тухай хэлэлцэж байна. Ялангуяа шинэчилсэн гэр хорооллыг суурин дээр нь хөгжүүлэх, зохион байгуулах, 200 айл тус бүрээр багцлах “Сервис центр”-ийн ажил дээр салбарын яамны томоохон дэмжлэгийг авч, гэр хорооллын иргэд өөрсдөө зохион байгуулж, дэд бүтцээ хангах, дан давхрын сууцаа барих боломжийг бий болгож байгаа нь энэ зөвлөгөөний гол үр дүн юм.

  Барилга, нийтийн аж ахуйн салбарын удирдах ажилтны зөвлөгөөн маргааш буюу 4-р сарын 29-ний өдөр “Нийтийн аж ахуйн зөвлөгөөн”, “Хөдөлмөр аюулгүй байдал, эрүүл ахуйн үндэсний V зөвлөгөөн”-өөр тус тус үргэлжилнэ.