Нийслэлийн мэргэжлийн хяналтын газрын улсын байцаагчдын хийсэн шалгалтаар хуурамч цемент худалдан борлуулж байсан зөрчил илэрчээ. БНХАУ-д үйлдвэрлэсэн, ил задгайгаар худалдаалагдаж буй "Мен Гао" гэх цемент нь стандартын шаардлага хангаагүй, хаяг шошгын зөрчилтэй, 50 кг байхаас 47,48 кг жинтэйгээр савлагдсан нь илэрсэн байна. Мөн барилгын материалын чанарыг баталгаажуулсан гарал үүслийн гэрчилгээ, лабораторийн батламж байхгүй аж.

   Гэтэл "Мен гао" үйлдвэрийн цементийг манай улсад 2016 оноос хойш оруулж ирээгүй бөгөөд сав баглаа боодлыг нь хуурамчаар үйлдэн цементийн орц найрлагыг өөрчлөн борлуулж байжээ. Цементийн дээжийг барилгын сорилын дүнгийн итгэмжлэгдсэн лабораторид шинжилж үзэхэд барьцалдах шинж чанарын хувьд чанарын шаардлага хангахгүй нь тогтоогдсон байна. Орц найрлагад ямар бүтээгдэхүүн хольсон нь одоогоор тодорхойгүй байгаа аж.

  Тиймээс иргэд хуурамч цемент худалдан авахаас сэргийлж, хаяг шошго, дагалдах баримт бичгийг сайтар үзэж байхыг мэргэжилтнүүд зөвлөлөө.