Монголын Архитекторуудын Эвлэл, Боловсрол, соёл, шинжлэх ухаан, спортын яам, Барилга, хот байгуулалтын яам хамтран 2017 оны 4 дүгээр сарын 27-ны өдөр “Дурсгалт барилгын хадгалалт хамгаалалт” сэдэвт зөвлөгөөнийг Улаанбаатар хотноо зохион байгуулав.

  Уг зөвлөгөөнд Монголын соёлын өв, архитектурын болон, түүхийн дурсгалт барилга байгууламжийг хамгаалах, сэргээн засварлах чиглэлээр ажилладаг төрийн болон төрийн бус байгууллага, эрдэм шинжилгээ судалгааны, зураг төслийн, гүйцэтгэгч, түүх соёлын дурсгалт барилга, байгууламжийг эзэмшигч зэрэг 20-иод байгууллагын 100 гаруй мэргэжилтэн, эрдэмтэд оролцож, холбогдох сэдвийн хүрээнд илтгэл тавьж зөвлөлдөв.

  Архитектурын болон, түүхийн дурсгалт барилга байгууламжийг сэргээн засварлах чиглэлээр ажилладаг аж ахуйн нэгжүүдийн төлөөлөл гүйцэтгэсэн төслүүдээ танилцуулж, Японы Нара хотын дурсгалт барилгын хадгалалт, үйл ажиллагааны, менежментийн туршлагаас танилцууллаа. Зөвлөгөөнд оролцогчид Монголын соёлын өвийн томоохон төлөөлөл архитектурын болон, түүхийн дурсгалт барилгыг хамгаалах, сэргээх засварлах, сурталчлах талаар төр засаг, аймаг нийслэл, хотын түвшинд дорвитой арга хэмжээ авахгүй байгааг, сүүлийн жилүүдэд тэдгээрийг нурааж, устгах ажлыг эрчимжүүлж байгааг таслан зогсоох цаг болсоныг онцоллоо.

  Монголд архитектурын дурсгалыг устгаж байгааг зохицуулах хууль эрх зүйн орчин байхгүй, салбаруудын уялдаагүйгээс 50 жилийн насжилттай барилгыг “ашиглах боломжгүй” гэдэг дүгнэлт гарган нурааж, оронд нь өөр барилга байгууламж барьж түүхээ устгаж байна.

  Монгол Улсын соёлын өв, архитектурын дурсгал, түүхийн дурсгалт барилга байгууламж устаж, түүнтэй хамт үндэсний уламжлалт соёл, ёс заншил устах аюул ойртож байгаад мэргэжлийн байгууллага, хүмүүс харамсаж Монгол Улсын Засгийн газарт Зөвлөмж хүргүүлж байна.

  “Дурсгалт барилгын хадгалалт хамгаалалт” сэдэвт зөвлөгөөнөөс гаргасан зөвлөмжийн дагуу төлөвлөгөө гаргаж ажиллахыг Боловсрол, соёл, шинжлэх ухаан, спортын яам, Барилга, хот байгуулалтын яам, Монголын Архитекторуудын Эвлэл-д зөвлөж байна.

МОНГОЛЫН АРХИТЕКТОРУУДЫН ЭВЛЭЛ
ЗӨВЛӨГӨӨНД ОРОЛЦОГЧИД

Улаанбаатар хот
2017.04.27