Монголын Үйлдвэрчний Эвлэлийн Холбооны Ерөнхийлөгч Х.Амгаланбаатар өчигдөр ОУВС-гийн Монгол дахь суурин төлөөлөгч Нэйл Сакерыг хүлээн авч уулзаж, ярилцлаа.

     Уулзалтын эхэнд Х.Амгаланбаатар МҮЭ-ийн холбооны байр суурийг танилцуулахдаа "Монгол Улсын Засгийн газар ОУВС-гаас хэрэгжүүлэх "Өргөтгөсөн санхүүжилтийн хөтөлбөр"-т хамрагдахдаа иргэдийн эрх ашгийг үл харгалзан бие дааж шийдвэр гаргасан. Уг хөтөлбөрт хамрагдсанаар Засгийн газраас найман төрлийн татвар нэмж, Хөдөлмөр, нийгмийн зөвшлийн гурван талт 2017-2018 оны хэлэлцээрийн дөрвөн заалтыг зөрчиж байна. Тиймээс Хөдөлмөрийн хөдөлмөрийн тухай хуулийн дагуу хамтын маргаан үүсч, болзошгүй байна. Ямартай ч дөрөвдүгээр сарын 28-ны өдөр хуралдах ОУВС-гийн захирлуудын зөвлөлийн хурлаар нааштай шийдвэр гаргана гэдэгт итгэлтэй байгаа" гэлээ. 

    ОУВС-гийн Монгол дахь суурин төлөөлөгч Нэйл Сакер Монгол Улсад хэрэгжүүлэх хөтөлбөрийн талаар тайлбар өгөхдөө, "Энэ хөтөлбөр нь Монгол Улсын эдийн засгийг тогтворжуулах зорилготой. МУ-ын Засгийн газар энэ хөтөлбөрт хамрагдаагүй байсан бол эдийн засаг нь улам хүндэрч, олон хүн ажилгүй болох байсан. Ийм нөхцөлд өөрийн нөөц бололцоогоор эдийн засгаа сэргээх бараг боломжгүй байдаг юм. Хөтөлбөрт хамрагдсанаар энэ онд эдийн засаг нь хасах үзүүлэлттэй гарах хэдий ч аажимдаа сэргэж 2019 онд эдийн засгийн өсөлт найман хувьд хүрнэ. Богино хугацаанд эдийн засгийг сэргээхэд зайлшгүй золиос гаргах шаардлагатай. Энэ золиос Монгол Улсын иргэн бүрээс гарах ёстой. Ингэхдээ бүгдэд ачааг тэнцүү үүрүүлэхийг хүссэнгүй. Орлого их олж байгаа иргэдэд голдуу их ачааг үүрүүлнэ. Хувь хүний орлогын албан татварт маш том өөрчлөлт гарсан." гэсэн юм.