Ирээдүйд байшин барилга барих ажил улам бүр амар хялбар болох бололтой. Токио хотын хүн амын нягтрал нэмэгдсэнтэй холбоотойгоор орон сууцны эрэлт хэрэгцээ дагаад өссөөр байна. Харин оршин суугчдын хэрэгцээг хангасан хамгийн орчин үеийн бөгөөд технологийн дэвшлийн ачаар төвөггүйхэн баригдах тус бүр жижиг бүтэцтэй цамхагийн төслийг энэ хотод эхлүүлжээ.

  Оршин суугчид нь дээд давхарт 3D хэвлэгчээр хэвлэж бэлэн болгосон модулиудыг захиалж, түүнийг нь доод давхар руу өргөгч цамхагаар зөөж, байрлуулах аж. Хасиф Рафейгийн зохион бүтээсэн загвараар барьж буй технологийн дэвшлийг бүрэн ашиглаж чадсан уг цамхагийн талаар энэ оны “eVolo Skyscraper Competition” тэмцээнд хүндэтгэлтэйгээр танилцуулахаар болсон байна.



  Токио хот нь өөрөө робот, автоматжуулалт, амьдралын минимал хэв маягаараа алдартай билээ. Тиймээс Хасиф Рафей нь эдгээр шинж чанарыг нь харгалзан үзэж Nagakin Capsule цамхагийн ирээдүйн хувилбарыг нь бүтээсэн аж. Токио хотноо автомат машинаар бүтээсэн маш том хүрээ бүхий уг байгууламжид амьдрах тав тухтай нөхцөл боломжийг нь бүрэн хангасан тус тусдаа жижиг бүтээцүүдийг байрлуулж, нэгэн цогц болгож байгаа юм.



  Эдгээр жижиг байшинг тухайн барилгын талбай дээр үйлдвэрлэж, өргөгч цамхагаар зөөвөрлөн үндсэн байгууламжид суурилуулах аж. Автоматжуулсан систем нь тэрхүү нэгж бүтэц бүрийн байршлыг өөрөө тооцоолж, алдаатай буюу буруу үйлдвэрлэгдсэн бүтээц бүрийг хэвлэгч машин дээр буцаан авчирдаг гэнэ.

  Оршин суугчид өөрсдийн хэрэгцээнд нийцүүлэн хэд хэдэн бүтээцийг худалдан авч, загвар хэмжээг том, жижиг гээд хүссэнээрээ өөрчилж, том орон зайг үүсгэх боломжтой юм байна. Түүнчлэн энэхүү бүтээцийг жижиг оффис болон үйлчилгээний зориулалтаар ашиглаж болох аж.