Хятад улс эрдэм шинжилгээ судалгаа, геологи хайгуулын төслүүдээ явуулахын тулд Өмнөд туйлд нисэх буудал барихаар болжээ.

Төлөвлөгөө ёсоор энэхүү нисэх буудал нь Өмнөд туйлын урд хэсэг дэх Хятадын “Чжуншань” судалгааны хоёрдугаар станцаас холгүйхэн баригдах юм байна. Одоо Хятад улс Өмнөд туйлд эрдэм шинжилгээний дөрвөн станцтай хэдий ч нисэх буудалгүй байгаа юм.

Тиймээс эрдэм шинжилгээний төслүүдээ хэрэгжүүлэхийн тулд Өмнөд туйлд нисэх буудал барихаар төлөвлөж байгаа тухай Хятадын Global Times сонин мэдээлжээ. Харин энэ буудлын талаар хүчин чадал болон өөр тодорхой мэдээлэл гараагүй байна.

Энд дуулгахад 2014 оны дөрөвдүгээр сард Хятад улс “Тайшань” нэртэй дөрөв дэх станцаа нээсэн юм. Энэ станц далайн түвшнээс дээш 2,6 километрийн өндөрт, “Чжуншань” болон “Кунлунь” станцуудын хооронд байрладаг. Түүнчлэн судлаачид тав дахь станцаа байгуулахаар газрыг нь товлосон тухай эх сурвалж мэдээлжээ.

Одоогийн байдлаар Хятад улс Өмнөд туйл руу ачаа хүргэхийн тулд усан замаар тээвэрлэлт хийдэг юм. Гэвч цаг уурын өөрчлөлтийн улмаас мөс ихээр хайлж байгаа нь тэнгисийн зөөвөрлөлтийн хурдыг сааруулахын дээр эрсдэл ихтэй болсон тул агаарын тээвэр зайлшгүй хэрэгтэй гэж судлаачид үзэж байгаа юм. Хятадын шинжээчдийн үзэж байгаагаар агаарын тээвэр ашигласнаар тээвэрлэлтийн үр ашиг өндөр байхын дээр Өмнөд туйл дахь Хятадын эрдэм шинжилгээ судалгааны ажлыг хурдацтай болгох гэнэ.

Дашрамд дуулгахад 1959 оны 12 дугаар сарын нэгний өдрийн дэлхийн хэлэлцээрийн дагуу Өмнөд туйл аль нэг улсад хамаарахгүй, дундын бүс болдог бөгөөд Хятад улс 1984 оноос эхлэн Өмнөд туйлд судалгаа хийж байгаа.