Эрчимтэй хөгжиж, дэлхий нийтийн гол хэрэглээ болоод буй интернэт, дижитал хэрэглээг барилгын салбарын маркетингд хэрхэн үр дүнтэй ашиглаж болох тухай сургалтыг гишүүн байгууллагуудынхаа дунд www.barilga.mn вэбээс зохион байгууллаа. Сургалтыг “Greensoft” ХХК-ийн Гүйцэтгэх захирал Э.Амар явуулсан юм.

  Сургалтаар дэлхийд болон манай улсад хэрэглэгдэж буй вэбсайтын хөгжлийн түвшин, энэ технологийн хөгжил хаашаа чиглэж байгаа тухай, мөн манайд өргөнөөр ашиглаж байгаа Фейсбүүкийн идэвхжүүлэлтийг хэрхэн явуулах, үнэ төлбөргүй онлайн программуудыг ашиглах гээд бизнес эрхлэгчид, маркетинг борлуулалтын менежерүүдэд хэрэгтэй, үнэ цэнэтэй зөвлөмжүүдийг хүргэсэн юм.

“Greensoft” ХХК-ийн Гүйцэтгэх захирал Э.Амар: Өмнө нь статик вэбсайтын үе буюу вэб 1:0 гэж ойлголт байсан. Үүний дараа вэб 2:0 ойлголт гарснаар хүмүүс вэбийг зүгээр үздэг байсан бол өөрсдөө оролцдог болсон. Энэ давалгаа нь дэлхийн бусад орнуудын хувьд аль хэдийн дуусчихсан, харин манайд бол вэб сайтууд нь ердийн нэг онлайн танилцуулга төдий хэвээрээ байна. Гэтэл олон улсын хэмжээнд вэбүүд дараагийн үедээ хэдийн орчихсон. Тухайлбал, хэрэглэгч тухайн сайтад нэвтрээд нэг барааг үзэж байх үед борлуулалтын менежер нь шууд залгаж, бараагаа сурталчлан, хэрэглэгчийн хүссэн асуултад хариулт өгдөг болсон. Яг л дэлгүүрт ороход худалдагч угтаж аваад бараагаа тайлбарлаж байгаа мэт. Тэгэхээр манай бизнес эрхлэгчид вэб сайтыг танилцуулгын түвшинд биш бодит үйлчилгээнд нэвтрүүлж ажиллах цаг болсон.

Байгууллагуудын ирээдүйд өрсөлдөх чадварыг үлэмж нэмэгдүүлэхийн тулд бизнесийн автоматжуулалтыг оновчтой ашиглах хэрэгтэй. Ялангуяа барилгын салбарт хэрхэн уялдуулах тухай ярья л даа. Жишээлбэл: Үл хөдлөх хөрөнгийн нэгэн компанийн реалторууд өглөөнөөс авахуулаад цайны цаг хүртэлх хугацааг борлуулж буй үл хөдлөх хөрөнгүүдээ Фейсбүүкийн зарын группуудэд түгээхэд зарцуулдаг. Харин үдээс хойших хугацааг гадуур өнгөрүүлж, байр үзүүлэх, худалдан авагчдыг дагуулж явахад зориулдаг. Гэтэл үдээс өмнөх тэр дөрвөн цагийг мэдээлэл түгээхэд зарцуулна гэдэг хайран хугацаа. Энэ ажлыг хөнгөвчилж, вэбээс холбогдох мэдээллийг Фейсбүүк группуудэд автоматаар түгээдэг шийдлийг хийх боломж бий.

Ер нь хаана, ямар ажил дээр хамгийн их хугацаа алдаж байгааг тодорхойлж түүнийг нь мэдээллийн технологийн тусламжтайгаар хэрхэн автоматжуулж, цаг хэмнэж болох талаар судлах хэрэгтэй. Мөн хэрэглэгчдийг хүссэн үед нь бараа бүтээгдэхүүний үнийн саналыг и-мэйлээр хавсаргаж явуулах, дахин дахин хэлж тайлбарлах гээд цаг хугацаа шаардсан тогтмол хийдэг ажлыг хөнгөвчилж, автоматжуулах бүрэн боломжтой. Өөрөөр хэлбэл, автоматаар хариу өгдөг харилцан ярианы хэсэг шиг /chat bot/ үнийн саналыг автоматаар өгөх шийдэл бий. Ингэхдээ и-мэйл, зурвасаар илгээх, илгээсэн мэдээллийг нээж харсан эсэхийг борлуулагчийн зүгээс нягтлах шийдлүүдийг борлуулалтын автоматжуулалтаар шийдэж болно.

Цаашлаад бизнесийн байгууллагууд интернэт орчинд автоматжуулалтыг нэвтрүүлж, хийж чадвал заавал компьютерийн мэргэжилтэнг ажиллуулах, мэргэжлийн хүнийг хөлслөх шаардлагагүйгээр асуудлаа шийдэх боломжтой.



  Сургалтад www.barilga.mn-ний гишүүдээс гадна гишүүн болохоор төлөвлөсөн зарим компанийн менежерүүд тухайлбал “ТАСО”, “Шаргал угалз”, “Минж проперти”, “Про-Хит”, “Термо Тех”, “Баатар Хайрхан Констракшн”, “Пирамид индастри”, “Термигаз Инмпианти Технологи” зэрэг 30 орчим гишүүн компанийн төлөөллүүд хамрагдсан юм.

  Оролцогчдын зүгээс тус сургалтыг цаг үеэ олсон хэрэгтэй, чухал сэдвээр явагдсаныг онцлоод цаашид тогтмол, тодорхой сэдвүүдээр зохион байгуулагдвал идэвхтэй оролцохоо мэдэгдэж, зарим нь ажил бизнест нь хамгийн хэрэгтэй байгаа сэдвээ ч санал болгон хэлж байлаа.

“Евро Ази Од” ХХК-ийн менежер О.Мөнхцэцэг: Юуны түрүүнд бид бүхэнд хэрэгтэй сургалтыг зохион байгуулсанд баярлалаа, олон ч мэдээлэл авч чадлаа. Дараагийн удаад менежмент, брошур загварын тухай сэдвээр сургалт явуулбал бас хэрэгтэй байна.

“Минж проперти” ХХК-ийн маркетингийн менежер У.Батчимэг: Сургалтаар богино хугацаанд боломжийн мэдээлэл, мэдлэг авч чадлаа. Цаашид барилгын салбарын маркетингийн чиглэлээр явуулах бүхий л сургалтад хамрагдах хүсэлтэй байна.

“ТАСО” ХХК-ийн Үйл ажиллагааны менежер Г.Жаргал: Маш их хэрэгцээтэй сургалт байна. Сургалтаар сонссон зүйлээ хэрэгжүүлэхэд асуух зүйл их байна. Давтан сургалт явуулах ч юм уу, иймэрхүү хэрэгцээтэй сургалтыг тогтмол зохион байгуулж байвал их баяртай байна. Баярлалаа.

“Пример инвестмент групп” ХХК-ийн маркетингийн менежер М.Солонго: Сургалт маш их таалагдсан. Вэб сайтаа хөгжүүлэх, шинэчлэх тухай болон бусад олон мэдээллийг олж авлаа. Цаашид сургалтыг тогтмол явуулж байхыг хүсч байна аа.

“Пирамид индастри” ХХК-ийн менежер Б.Анударь: Цагаа олсон үр дүнтэй сургалт байна. www.barilga.mn сайтын шинэчлэлтэй холбоотой мэдээллийг өгөхийн хажуугаар анхаарах хэрэгэтй олон зүйлийг мэдэж авлаа. Дараагийн ээлжинд энэ төрлийн шат дараалсан сургалтыг явуулбал илүү үр дүнтэй болов уу.

“Баяжих цогцолбор” ХХК-ийн менежер н.Бархас: Сургалт маш үр дүнтэй санагдлаа. Дараагийн удаад вэб сайт болон фейсбүүк-т нийтлэл оруулах, хэрэглэгчдийн сонирхлыг хэрхэн татаж, хандалтаа нэмэгдүүлэх талаар сургалт явуулаасай гэж хүсч байна.