Хот төлөвлөлт, барилга байгууламжийг хүссэнээрээ өөрчилж, шинийг санаачлан бүтээх эрмэлзэлтэй архитектор, барилгын инженерүүдэд хэрэгтэй барилгын шинэ төрлийн блокны иж бүрдлийг санаачлан бүтээжээ. “Arckit” компанийн энэхүү блок нь хот төлөвлөлтийг зохион байгуулах загварчлалыг бүтээхэд зориулагдсан жижигсгэсэн хувилбар юм. Тус компаниас одоогоор шинэ хот бүтээхэд зориулагдсан “Kickstarter” кампанит ажлыг эхлүүлээд байгаа аж.



  Архитектор Дэмиэн Муртагийн үүсгэн байгуулсан “Arckit” компани нь 2014 онд санаачлан бүтээсэн барилгын иж бүрдэл бүхий блокоороо архитектурын ертөнцөд томоохон тэсрэлтийг хийхээр төлөвлөжээ. Харилцан хооронд нь сольж болохуйц хэсгүүдтэй, дахин ашиглагдах боломжтой, Леготой төстэй уг блок нь барилгын загварыг гаргахад илүү тохиромжтой юм.



  Хот төлөвлөлтийн загварыг гаргах блокны иж бүрдэл нь гаргасан загвараа хуулбарлах, мэргэжлийн бусад хот байгуулагчдад дамжуулан өгөх, туршилт болон дүн шинжилгээ хийхэд хялбар, хот суурин газрын загварыг чөлөөтэй гаргах боломжийг олгосон онцгой бүтээгдэхүүн болжээ.



  “Arckit” компанийн зүгээс ArcKit Cityscape болон Arckit Masterplan төрөл гэх мэтээр “Kickstarter” кампанит ажилдаа зориулан 12 төрлийн шинэ загварын блокны иж бүрдлийг танилцуулсан байна.



  Cityscape XL, Cityscape XXL, Masterplan болон Masterplan Pro зэрэг иж бүрдэл нь мэргэжлийн түвшнийхэнд зориулагдсан хэдий ч эдгээр бүх иж бүрдэл блокыг ямар ч насныхан хэрэглэж болдгоороо давуу талтай аж. Иж бүрдэл тус бүр нь өөрийн гэсэн онцлог бүрэлдэхүүн хэсгүүдтэй бөгөөд цагаан болон бусад олон төрлийн өнгөөр архитектурын шинэ бүтээл туурвих боломжтой гэнэ.



  “Хотын захын хорооллуудаас төв хэсгийн тэнгэр баганадсан өндөр цамхгуудыг бүтээгч, хотын цэцэрлэгт хүрээлэнг байгуулагч, дизайнерууд гээд бүх насныхан жинхэнэ архитетор, жинхэнэ хот төлөвлөгч шиг л эдгээр иж бүрдлийг ашиглах боломжтой.” хэмээн компанийн зүгээс мэдэгдсэн юм.