МҮИC-ийн харьяа Универсал Политехник Коллежийн захирал Д.Энхчимэг:
Сайн багшаас сайн шавь төрдөг
 

- Сүүлийн жилүүдэд барилгын салбарт хамгийн эрэлттэй байгаа мэргэжлүүдийн талаар яриагаа эхэлье.

- Аливаа улс орны нүүр царай бол шилдэг архитекторуудын шийдлээр баригдсан барилга байгууламжууд шүү дээ. Нэг үеэ бодвол манай улсын барилгын салбар цэцэглэн хөгжиж, энэ салбарт ажиллах мэргэжилтэй ажилчдын ур чадварт ахиц дэвшил гарсаар байна. Гадны мэргэжилтнээс дутахгүй, барилгаа ч барьж чаддаг болсон. Ер нь барилгын салбарт байх ёстой бүхий л мэргэжилтэн эрэлт ихтэй байна. Тэнд мэргэжилгүй ажилчид байсаар байгаа нь барилгын чанарт нөлөөлөх сул талтай.

Монгол Улс бүтээн байгуулалт, хөгжил цэцэглэлтийн ид үедээ ирсэн, олон мэргэжилтэй ажилчид дутагдалтай байгаа энэ цаг үед гагнуурчин, барилгын мужаан, засал чимэглэлчин, өрөг угсралт, бетон хийц, барилгын цахилгаанчин, барилгын техникч, бетон арматурчин, барилгын дулаан хангамж, агаар сэлгэлтийн техникч гээд бүх мэргэжил л эрэлт хэрэгцээтэй байна. Эдгээр мэргэжлүүдээр манай Коллеж 1. 1,5. 2,5. 3 жилийн ангиуддаа 9, 12-р анги төгсөгчдийг хамруулж, мэргэжлийн сургалтыг амжилттай явуулж байна.

Эх орны баялаг бүтээгчид мэргэжлийн боловсролын сургуульд суралцаж, орчин үеийн бүтээн байгуулалтыг хийх энэ их үйлсэд бидний бэлтгэсэн бүтээгдэхүүн эрэлттэй байж, үнэтэй хувь нэмрээ оруулж эхэлж байгаад баяртай байдаг.

- Өнөө цагт бүтээлч, чадварлаг мэргэжилтнийг бэлтгэхэд сургалтын ямар бодлого, орчин шаардагдаж байна вэ?

- Мэдээж сургалтын бодлого орчин хамгийн чухал асуудал. Бид Коллежийн үйл ажиллагаа, сургалтын чанар, багшийн мэргэжлийн чадварын түвшинд судалгаа шинжилгээ хийж, хичээлийн жилийн зорилтоо тодорхойлж хэрэгжүүлдэг. Мэргэжлийн боловсрол, сургалтын багшийн хөгжил хөтөлбөр боловсруулж, тэднийг давтан сургах, мэргэшүүлэх хэлбэрээр хүний нөөцийг чадавхжуулж ур чадварт нь бодитой ахиц гаргахаар хичээн ажиллаж байна.

- Универсал Политехникийн Коллежийн зүгээс сургалтын арга барилдаа ямар онцлогуудыг тусгаж байна?

- Суралцагчдыг хөгжүүлэх, тэдний нийгмийн асуудлыг шийдвэрлэх, хүнлэг энэрэнгүй ёс суртахуун, бүтээлч ажилсаг зан чанарыг төлөвшүүлэн хэвшүүлэхэд багшийн үүрэг асар их. Манай багш нар ээлжит хичээлд идэвхтэй бүтээлч арга хэлбэрээр суралцагчийн мэдлэг, чадварын түвшинд тасралттгүй ахиц гаргахад анхаарч ажилладаг. Мөн нийгмийн түншлэлийн хүрээг өргөтгөн, хамтын ажиллагааг тэлж, суралцагч бүрийг ажил олгогчтой холбосноор ажлын байранд дадлагажих, төгсөөд ажлын байртай болох бодит нөхцөл бүрдсэн. Сайн багшаас сайн шавь төрдөг.



Энэ хичээлийн жилд багш нарыг чанаржуулахад онцгой анхаарч ажилласан бөгөөд өнөөдрийн байдлаар манай коллежид 16 мэргэжлээр 683 оюутан суралцаж байна. Нийт багш нарын 80% нь магистр болон түүнээс дээш зэрэгтэй ба Монгол Улсын зөвлөх инженер багш  5, Мэргэжсэн инженер 1, Мастер багш 2, Тэргүүлэх зэрэгтэй багш 3, Заах арга зүйч багш 7 ажилладаг. Одоогоор 271 төгсөгчийг Гүний хайгуулын өрөмдөгч, Төлбөр тооцоо болон хангамжийн нярав, Барилгын цахилгаанчин, Барилгын засал чимэглэлчин, Тогооч мэргэжлээр төгсгөж, улс орныхоо хөгжилд тодорхой хувь нэмрээ оруулаад байна. Мөн 2017-2018 оны хичээлийн жилд эрэлт хэрэгцээтэй 39 мэргэжлээр элсэлт авахаар төлөвлөлөө.

- Оюутнуудын сургалтын орчинг хэрхэн бүрдүүлэв? Ялангуяа техник тоног төхөөрөмж, лабораторийн хувьд давуу талуудаа дурдвал...

- Манай хамт олон он цаг бүрийг ахиц дэвшлээр угтан, тогтвортой хөгжин бэхжиж Монгол Улсдаа төдийгүй дэлхийд танигдсан сургууль болохоор итгэл дүүрэн ажиллаж байна. Сургалтын ая тухтай орчин бүрдүүлж, чадварлаг мэргэжилтэн бэлтгэхэд шаардлагатай тоног төхөөрөмж, багаж хэрэгслээр хангагдсан лаборатори, дадлагын газруудтай.

Коллеж маань дадлагын газар 14, лаборатори 3, лекцийн болон хичээлийн танхимууд, сургалтын урлан, спорт заал, номын сантай. Өөрийн хичээлийн байр болон орон сууцны шийдлээр баригдсан дотуур байртай. Дадлагын газруудын тоног төхөөрөмжийн хувьд жил бүр тодорхой хөрөнгө оруулалтаар сайжруулан шинэчилж, сургалтад ашиглаж байна.

- Оюутан солилцоогоор, эсвэл оюутнуудаа гадаадад сургах боломж бий юу?

- Манай сургууль дэлхийн топ 500 сургуулийн нэг болохоор зорин ажиллаж буй МҮИС-ийн харьяа сургууль учраас гадаадын 26 орны 50 гаруй сургуультай хамтын ажиллагааны гэрээтэй ажилладаг. Эхний ээлжинд БНСУ, БНХАУ, ОХУ-тай оюутан солилцохоор тохироод байна. Одоогоор Шилийн гол аймгийн Ажил Мэргэжлийн Дээд Сургуультай дээрх асуудлыг тохиролцсон. Мөн Дэлхийн болон Азийн ур чадварын олон улсын тэмцээнд идэвхтэй оролцох том зорилт тавьж, багш суралцагчид маань бэлтгэл ажлаа эхэлчихсэн байгаа.



- Сургалт, мэргэжил олголтыг чанаржуулахын тулд холбогдох төрийн байгууллагуудаас ямар бодлого зохицуулалт хэрэгтэй байна вэ?

- Манай мэргэжлийн боловсролыг хариуцан ажилладаг ХНХЯ-ны МБ-ыг хариуцсан хэлтэс, ХХҮЕГ, Бүсийн арга зүйн мэргэжилтнүүд харьцангуй сайн ажиллаж байгаа. Гэхдээ мэргэжлийн боловсрол эзэмшиж буй суралцагсдад олгодог 70000 төгрөгийн тэтгэлэг хасагдсантай холбогдуулан элсэлт багасаж байгаад сэтгэл дундуур явдаг. Учир нь ирээдүйн баялаг бүтээгч мэргэжилтэй ажиллагсад улс эх орондоо маш их хэрэгтэй, тэдэнд санхүүгийн дэмжлэг болдог энэ тэтгэлэг тэдэнд амжилттай суралцах том дэмжлэг болдгийг дурдах хэрэгтэй. Тэдний ихэнх нь хүнд хэцүү нөхцөлд амьдардгийг анхаарч, санхүүжилтийг зохицуулж тэтгэлгийг дахин сэргээж өгөх шаардлагатай бас хэрэгтэй гэдгийг хэлмээр байна.