Сүүлийн жилүүдэд барилгын салбарын бодлого зөвхөн орон сууц, дэд бүтцэд чиглэх болсон. Одоо ч нэг их ялгаагүй. Харин одоо барилгын материалын борлуулалтыг томоохон төслүүд рүү чиглүүлэх хэрэгтэй хэмээн өчигдөр МҮАҮТ-д болсон “Барилгын материалын ханган нийлүүлэгчдийн чуулган 2017” дээр салбарынхан хэлж байлаа.

Ялангуяа зам тээвэр, эрчим хүчний салбарт төлөвлөгдсөн томоохон төсөл хөтөлбөрүүдийг эрчимтэй хэрэгжүүлж салбар хоорондын уялдааг зохицуулж, барилгын материалын үйлдвэрүүдийн хүчин чадлыг сайн ашиглах нь одоогийн  хямралаас гарах боломжтойг онцолж байв.

Энэхүү томоохон бөгөөд хүлээлттэй байгаа төслүүдэд Шивээ-Овоо, Тэвшийн Говийн нүүрсний ордыг түшиглэсэн цахилгаан станцууд, бүх аймгийн төвийг нийслэлтэй хатуу хучилттай авто замаар холбож дуусгах болон Баянзүрх, Яармаг, Сонсголонгийн гүүр, Улаанбаатар-Налайх чиглэлийн автозам болон Улаанбаатар хотын гүүрэн гарцуудыг шинээр байгуулах, Тавантолгой-Гашуун сухайт, Хөөт-Бичигт, Шивээ хүрэн-Сэхэ, Эрдэнэт-Овоот чиглэлийн төмөр замыг барьж байгуулах ажлыг эхлүүлэхийг салбарынхан хүлээж байна.



         Чуулганд нийт 250 гаруй салбарын төлөөлөл оролцсон бөгөөд хэлэлцүүлэгт идэвхитэй оролцож, олон санал санаачилга гаргасны дээр харъяа яаманд уриалга гарган хүргүүлэхээр боллоо. /Эндээс гарсан уриалгыг мэдээний төгсгөлд хавсаргав./

         Монголын Барилгын материал үйлдвэрлэгчдийн холбооны мэдээлснээр сүүлийн таван жилд 350 гаруй барилгын материалын жижиг дунд үйлдвэр ашиглалтад орж, орон сууцны барилгад өргөнөөр хэрэглэгддэг 40 гаруй нэр төрлийн материалын 70 хувийг дотооддоо үйлдвэрлэх боломжтой болжээ.

2016 онд цементийн томоохон төслүүд хэрэгжиж жилд нэг сая тонн цементийг хуурай аргаар үйлдвэрлэх дөрвөн том үйлдвэр шинээр ашиглалтад орж, цементийн хэрэгцээг хангаад зогсохгүй экспортлох боломжтой болсон. Дотоодын хэрэгцээг бүрэн хангах боломжтой болсон төрлүүдээс онцолбол бэлэн бетон зуурмаг, инженерийн болон иргэний барилгын бетон төмөр бетон хийц эдлэлүүд, керамик тоосго, хувцанцар цонх хаалга, сантехникийн төрөл бүрийн хуванцар хоолой, дулаалгын хөөсөнцөр хавтан зэрэг багтаж байна.



Энэ үеэр чуулганд оролцохоор БХБ-ны сайд асан, УИХ гишүүн Д.Цогтбаатар ирсэн байлаа. Тэрээр ярихдаа, “Салбарын хөгжлийн тогтвортой байдлыг хангахад зөвхөн барилгын компаниуд бус үл хөдлөх хөрөнгийн салбарыг хүртэл давхар дэмжих хэрэгтэй. Аль хэдийн баригдсан байрны үнэ тогтворгүй, нааш цааш хөдлөж байгаа нь эдийн засгийн суурь ганхах эрсдэл байна гэсэн үг юм. Үүнд нэн түрүүнд нөлөөлдөг зүйл нь барилгын материал юм. Барилгын материалын үйлдвэрлэл нь өөрөө энэхүү салбарын суурь эдийн засгийн бат бэх байдал, тогтвортой байдлыг хангаж байдаг. Би өнөөдрийн энэхүү чуулган дээр барилгын салбарт өнөөдөр ямар хүндрэл, бэрхшээл байна тэр бүгдийг мэдье гэж бодоод ирж байна. Учир нь зүгээр энэ тэндээс мэдээлэл авах нэг өөр. Хүндрэл бэрхшээл бүрийг тодотгож гаргалгүй, боломжийн талын асуудлуудыг тавих асуудал байдаг. Харин бизнес эрхлэгчдээс өөрсдөөс нь сонсоход нэг өөр.” гэлээ.

         Барилгын материал үйлдвэрлэгчид, бөөний худалдаалагчид нэгдэж “Барилгачин” группийг үүсгэн байгуулснаа зарлалаа.
Тус группын үйл ажиллагаа барилгын материалын ханган нийлүүлэлтийн нэгдсэн тогтолцоог бий болгож, чанартай, хямд бүтээгдэхүүнийг нэг сувгаар эцсийн хэрэглэгчдэд хүргэхэд чиглэж буй аж. Группын албан ёсны нээлт ирэх сарын 17-нд болох аж.



Мөн үеэр салбарын яамнаас барилгын чанар нь үндэсний аюулгүй байдалд нөлөөлөхүйц асуудал учир аж ахуйн нэгжүүдэд шаардлага хангасан материалаар барилга барихыг анхаарууллаа.

МҮХАҮТ-ын Ерөнхийлөгч Б.Лхагважав ярихдаа, “Өнөөдрийн байдлаар 30 мянган орон сууц борлогдоогүй байна. Дөрвөн том цементийн үйлдвэрээс гадна 100-гаад бетон зуурмагийн үйлдвэр хаалгаа барьсан. Энэ нь зөвхөн барилгын салбараар хэмжигдэхгүй хөрөнгө оруулалт хийж буй зээл олгосон арилжааны банкуудад ч хүндхэн тусч байна. Барилгын салбарын худалдан авалтын дийлэнх нь бартер болсон байна” гэлээ.



Энэ талаар “Монголын бартер Эксченж” компанийн борлуулалт хариуцсан захирал Д.Энхболд “Бидэнд барилгын чиглэлийн бартерын хандалт их ирж байна. Манай компанийн үзүүлж буй бартерын үйлчилгээ нь олон талт зуучлалтай учир харилцагчдад өргөн сонголт хийх боломж бүрддэг. Жишээлбэл, барилгын компанид түүхий эд материал хэрэгтэй. Харин барилгын материалын компанид байр орон сууц хэрэггүй шүү дээ. Ийм тохиолдолд гуравдагч байгууллагын бүтээгдэхүүнийг бартерлах боломжийг олгож байна" хэмээн онцлов.
 

1. Засгийн Газар, БХБЯаманд тавьж шийдвэрлүүлэх асуудал

1. Барилгын салбарт төрөөс баримтлах бодлогын баримт бичигт салбарын ханган нийлүүлэгчдэд чиглэсэн бодлого тусгах
2. Төрийн чиг үүргийн төрийн бус байгууллагад шилжүүлэх ажлын хүрээнд мэргэжлийн холбоодод шилжүүлэх ажлын чиг үүргийг тодорхойлж, шилжүүлэх
3. Барилгын материалын үйлдвэрлэлийн тусгай зөвшөөрлийн хамрах хүрээг багасгаж, үйл ажиллагааг хялбаршуулах
4. Үндэсний үйлдвэрлэгчдийг дэмжсэн ЗГ-ын тогтоолын хэрэгжилтийг хангаж ажиллах
5. Төрийн болон олон нийтийн өмчийн хөрөнгөөр гүйцэтгэсэн ажлын төлбөрийг шуурхай барагдуулах

2. Нийслэлийн харьяа байгууллагуудад тавьж, шийдвэрлүүлэх асуудал

1. Нийслэлээс хэрэгжүүлж байгаа төсөл хөтөлбөр, Гэр хорооллын дахин төлөвлөлт, дэд бүтцийн бүтээн байгуулалтанд үндэсний үйлдвэрлэгчдийн барилгын материалыг ашиглах
2. Налайхын барилгын материалын үйлдвэрлэл технологийн паркын бодлого үйл ажиллагааг тодорхой нээлттэй болгож, үйлдвэрлэгчдэд

3. Барилгын салбарын мэргэжлийн холбоодоос хамтран хэрэгжүүлэх ажлууд

1. Барилгын салбарын ханган нийлүүлэгчдийн зөвлөлийг байгуулан ажиллаж, ханган нийлүүлэгчдийн бүртгэл, судалгааг хийх
2. Барилгын салбарын ханган нийлүүлэгчдийн чадавхыг сайжруулах чиглэлээр ажиллах
3. Барилгын салбарын ханган нийлүүлэгчдийн судалгаанд үндэслэн улирал бүр мэдээлэл гаргаж, “Барилга.МН” сэтгүүл, сайтаар дамжуулан олон нийтэд хүргэх
4. Үйлдвэрлэгч, импортлогчдын өмнө тулгамдаж буй асуудлаар ханган нийлүүлэгчдээс мэдээлэл бэлтгэн төр захиргааны төв байгууллагад өгөх

4. Барилгын салбарын аж ахуйн нэгж байгууллагаас хийх ажлууд

1. Өөрсдийн үйлдвэрлэлийн үйл ажиллагаанд тулгарч буй асуудал бэрхшээлийг ижил төстэй үйл ажиллагаа эрхлэгч бусад байгууллагатай хамтран гаргаж, төрийн захиргааны төв байгууллагад албан ёсоор хүргэх
2. Барилгын материал үйлдвэрлэгчид, ханган нийлүүлэгчид нэгдсэн зохион байгуулалтанд орж ажиллах
3. Үйлдвэрлэж, импортолж байгаа бараа бүтээгдэхүүнийхээ БТКУС кодыг МБМҮХ-нд гаргаж өгөх