Монголын эмэгтэй архитекторуудын гурван үеийн төлөөлөл хамтран уран бүтээлийн үзэсгэлэнгээ өнөөдөр Архитекторуудын ордонд нээж, хэлэлцүүлэг, уулзалтыг зохион байгууллаа. Эмэгтэйчүүдийн баярыг тохиолдуулан, Монголын Архитекторуудын Эвлэлээс санаачлан явуулж буй уг арга хэмжээ нь эмэгтэй архитекторуудын бүтээлийг олон нийтэд дэлгэн үзүүлж, тэдний ажил бүтээлийг сурталчлан таниулах зорилготой юм. Үзэсгэлэнг нээж МАЭ-ийн Ерөнхийлөгч Э.Хүрэлбаатар, БХБ-ын Дэд сайд Ш.Лхамсүрэн нар үг хэлж, ёслолын тууз хайчиллаа.





МАЭ-ийн Ерөнхийлөгч Э.Хүрэлбаатар: МАЭ-ийн УЗ-ийн шийдвэрээр Олон улсын эмэгтэйчүүдийн эрхийг хамгаалах өдрийг угтан “Архитектор эмэгтэйчүүдийн уран бүтээлийн үзэсгэлэн”-г өнөөдөр ийнхүү нээж байна. Цаашлаад жил бүр уг арга хэмжээг зохион байгуулах болно. Анхны үзэсгэлэнгийн ерөнхий зохион байгуулагчаар ажилласан манай эвлэлийн ахмад гишүүн, МУ-ын Зөвлөх архитектор Д.Цэвэлмаадаа баяр хүргэе. Мөн үзэсгэлэнгийн ивээн тэтгэгчээр хамтран ажилласан эмэгтэй архитекторууд болох “Очиртааб” ХХК-ийн захирал Б.Чанцалмаа, “N.A.P Mongolia” ХХК-ийн захирал М.Уянга нарт талархлаа илэрхийлье.

Өнөөдрийн үзэсгэлэнд Улс орныхоо бүтээн байгуулалтад гар бие оролцож байдаг эмэгтэй архитекторуудын төлөөллүүд маань бүтээл, эрдмийн ажлуудаа дэлгэн үзүүлж байна. Тухайлбал, Архитектор З.Оюунбилэгийн бүтээл, мөн залуу архитекторуудын гар урлал, зургийн бүтээлүүд байна. Эдгээрээс бид онцлог бүтээлүүдийн шалгаруулан, оны шилдэг бүтээлд дэвшүүлж, олон улсын хэмжээнд сурталчлах юм.



БХБ-ын Дэд Сайд Ш.Лхамсүрэн: Өнөөдөр эмэгтэй архитекторуудын уран бүтээлийн үзэсгэлэнд уригдан оролцож байгаадаа баяртай байна. БХБЯ-ны зүгээс нийт архитекторуудтайгаа, мэргэжлийн холбоодтойгоо нягт холбоотой хамтран ажилласаар байгаа. 2016 онд Яамны зүгээс төрийн зарим чиг үүргийг мэргэжлийн холбоодод шилжүүлэх шийдвэрийн дагуу МАЭ-д мэргэжлийн зөвлөл, сургалт зохион байгуулах эрхийг нь олгосон. Энэ нь бодлого чиглэлээ тусгаж мэргэжлийн сургалтуудаа явуулахад нь, ирээдүйн ажилд нь дэмжлэг болно гэдэгт итгэлтэй байна.

Манай архтекторуудын барилга байгууламжууд нь он удаан жил урлагийн бүтээл болон сүндэрлэж, барилгын салбартаа манлайлал нь байна гэдэгт итгэж байна. Гурван үеийн төлөөлөл болсон архитекторууд эмэгтэйчүүдийнхээ үзэсгэлэнг үзэж сонирхохоос гадна тэдний оролцсон хэлэлцүүлгийг сонсох боломжийг олгосонд баярлалаа. Энэ хэлэлцүүлэг нь өнгөрсөн, одоо, ирээдүйн архитектурын байдалтай танилцаж, дүгнэлт хийх боломжийг олгож байна.