Монгол Улсын хэмжээнд хийгдэх бүтээн байгуулалт, барилгажилтын ажлыг олон улсын стандартын шаардлагад нийцсэн эх орны үйлдвэрийн, гол нэр төрлийн барилгын материалаар хангах, улмаар үүний үндсэн дээр материалын үйлдвэрлэл эрхлэгчдийг дэмжин, барилгын материал үйлдвэрлэлийг түрүүлж хөгжүүлэхэд явдал чухал юм. Энэ салбарын өнөөгийн байдлын тухай холбогдох албаны хүн товч мэдээлэл өглөө.

 
БХБЯ-ны Барилгын материалын үйлдвэрлэл, лаборатори хариуцсан мэргэжилтэн Г.Цэрмаа
    
      Барилгын салбарт хамгийн чухал нь барилгыг бүтээдэг материал. Барилгын материалын үйлдвэрлэлийг хөгжүүлэх, дэмжих, бүтээгдэхүүний чанарыг сайжруулах, импортыг бууруулах, экспортод гаргах зэрэг асуудлыг шийдвэрлүүлэх бизнесийн таатай хууль эрх зүйн баримтуудыг боловсруулж, хэрэгжүүлж байна. Үүний томоохон жишээ нь, Засгийн газрын 2012-2016 онд хэрэгжүүлэх үйл ажиллагааны хөтөлбөрт тусгагдсан барилгын материалыг эх орондоо үйлдвэрлэж, цемент, төмөр хийц, дулаалгын материал зэрэг бүтээгдэхүүний хэрэгцээг дотоодын үйлдвэрээр хангах зорилтын хүрээнд Засгийн газрын 2012 оны 171 дүгээр тогтоолоор батлагдсан “Барилгын материалын үйлдвэрлэлийг дэмжих” хөтөлбөр юм.  
      
Өнгөрсөн хугацаанд хэрэгжүүлсэн хөтөлбөр, хөрөнгө оруулалтын үр дүнд шинээр ашиглалтад орсон болон орохоор төлөвлөгдсөн цементийн үйлдвэрүүд дотоодын хэрэглээг хангаад зогсохгүй экспортлох боломжтой болоод байна.
 
Барилгын материалд шаардлагатай эрдэс түүхий эдийн ордын нөөц хэмжээг төрөлжүүлэн судлахад керамикийн түүхий эдийн нөөц 221,9 сая м³ байна. Үүнээс  үйлдвэрийн нөөцөөр 12,6 хувь, дүүргэгч материалын нөөц 384,7 сая м³ үйлдвэрлэлийн нөөцөөр 12,4 хувь, барьцалдах материалын түүхий эд 292,2 сая тонн, үйлдвэрлэлийн нөөцөөр 13,6 хувь, хөнгөн дүүргэгчийн нөөц 49,8 сая м³, үүнээс үйлдвэрийн нөөцөөр 18,1 хувь нь тогтоогдсон.
 
Барилгын үндсэн материал болох цементийн 60-70 хувийг бид импортоор оруулдаг байсан үе бий. Гэтэл өнөөдөр бид өөрсдийн түүхий эдийн нөөц дээр түшиглэн цементээ 100 хувь хангах нөхцөл бүрдсэн нь барилгын материалын үйлдвэрлэлд ажиллаж байгаа аж ахуй нэгжүүдийн хамгийн том амжилт. Бид дотооддоо чанартай барилгын материал үйлдвэрлэхийн хирээр барилга, байгууламжийн чанар сайжирна шүү дээ. Барилгыг чанартай удаан эдэлгээтэй, тохилог өнгө үзэмжтэй сайхан байлгахыг л хүсвэл бид түүнийг бүтээдэг материалын үйлдвэрүүдийг дэмжиж ажиллах нь зайлшгүй.