Хүрээлэн буй орны олон янзын нөлөөллийг багасгах барилгын дэвшилтэт шинэ материалуудын нэгт геополимер бетон буюу “Ногоон бетон” тооцогдоно. Энэхүү бетоныг органик бус полимер болон үйлдвэрлэлийн 25-100 хүртэлх хувийн хаягдал хоёрын холимгоор хийдэг ажээ.

Барилга байгууламжид энэхүү ногоон бетоныг ашигласнаар үндсэн 4 ач холбогдолтой. Үүнд:

1. Ашиглалтын хугацааг уртасгах.

Ногоон бетон нь хурдан бэхжих бөгөөд Портланд цементэн бетоныг бодвол хатаж агших магадлал нь бага юм. Энэхүү бетоныг ашиглан барьсан барилгын галд тэсвэртэй чанар нь нэмэгддэг (Фаренгейтийн хэмжүүрээр 2400 хэм хүртэлх температурт тэсвэртэй). Мөн энэ нь хүрээлэн буй орчныг бохирдуулахад ихээхэн нөлөө үзүүлдэг зэврэлтээс хамгаалах гайхалтай шинж чанартай (хүчиллэг бороо нь барилгын материалын эдэлгээг муутгадаг). Иймээс ердийн бетоныг бодвол ногоон бетон нь ашиглалтын хугацаа урттай болдог. Үүнтэй төстэй найрлага бүхий бетон эртний Ромын эзэнт гүрний байгууламжаас илэрсэн байдаг. Мөн 1950, 1960-аад оны үед Украйн улсад уг бетоныг ашиглаж барьсан барилгууд нь одоог хүртэл яс чанараа харуулсаар байгаа юм. Хэрэв барилгыг шинэчлэн засварлах шаардлагатай бол барилгын цөөн тооны материал л хэрэг болох бөгөөд тэдгээр материалыг бэлтгэж, хийх явцад хүрээлэн буй орчинд ямар нэг сөрөг нөлөө үзүүлэхгүй юм.

2. Үйлдвэрлэлийн хаягдлыг ашиглах.

100 хувь Портланд цементийн холимгийг ашиглахын оронд 25-100 хувийн дэгдэмхий үнсийг ашигладаг. Дэгдэмхий үнс нь нүүрсний шаталтын дайвар бүтээгдэхүүн бөгөөд нүүрс ашигладаг эрчим хүчний эх үүсвэртэй үйлдвэрүүдийн (цахилгаан станц гэх мэт) яндангаас цуглуулдаг. Энэ мэт олон төрлийн үйлдвэрлэлийн хаягдал бүтээгдэхүүн элбэг байдаг билээ. Олон зуун мянган га газарт дэгдэмхий үнсийг тараан булж байдаг. Харин үүний оронд барилгын салбарт ногоон бетоныг хийхэд ашигладаг болсноор байгаль орчинд хог болон хөглөрч буй дэгдэмхий үнсний асуудлыг нэгмөсөн шийдэх боломжтой.

3. Эрчим хүчний хэрэглээг багасгах.

Бетоныг хольж байхдаа Портланд цементийг багасгаж, дэгдэмхий үнсийг түлхүү ашиглавал эрчим хүчний хэрэглээ эрс буурах сайн талтай. Портланд цемент хийхэд ашиглагддаг материалуудыг тохиромжтой температурт нь хүргэхийн тулд их хэмжээний нүүрс, байгалийн хий шаарддаг. Харин дэгдэмхий нүүрс нь хэдийн боловсруулагдсан дайвар бүтээгдэхүүн учир үүгээр ногоон бетон хийхэд их хэмжээний эрчим хүч ашиглах хэрэггүй юм. Түүнчлэн орчны температурын янз бүрийн нөлөөнд тэсвэртэй тул ногоон бетоноор барьсан барилгад мөн л эрчим хүч бага шаардагддаг. Архитекторууд барилга байшин төлөвлөн барихдаа ногоон бетоныг хэрэглэвэл, ашиглалтын хугацаан дахь халаалт, агааржуулалтад ч мөн маш бага хэмжээний эрчим хүч шаардагдана.

4. Нүүрстөрөгчийн давхар ислийг бууруулах.

Портланд цементийг хийхийн тулд түүнд агуулагдах ёстой энгийн нунтагласан шохой чулуу, шавар, элс зэрэг гол хольцуудыг байгалийн хий болон нүүрс, шатахуун ашиглаж 1450 хэм хүртэл халаадаг. Ингэснээр дэлхий дээрх нийт нүүрсхүчлийн давхар ислийн 5-8 хувийг нь ялгаруулдаг аж. Харин ногоон бетоны үйлдвэрлэл нь нүүрсхүчлийн давхар ислийн ялгарлыг 80 хүртэлх хувиар бууруулах боломжтой. Дэлхийн бүх улс орнууд нүүрсхүчлийн давхар ислийн ялгарлыг багасгахад өөрсдийн хувь нэмрийг оруулж, барилга байгууламжууддаа ногоон бетон ашиглахыг хүлээн зөвшөөрдөг болох хэрэгтэй байгаа юм.

Дэлгэрэнгүй мэдээллийг "Барилга.МН" сэтгүүл №81-ээс авна уу.