Италийн Милан хотноо баригдаж хэдийн нэрд гарсан, архитектор Стефано Боэригийн “Босоо ой”-г Хятадын Нанжин хотноо сүндэрлүүлэх ажлыг гүйцэтгэж байна. Нанжин хотын цамхагуудтай эн зэрэгцэн сүндэрлэх, ногоон байгууламж бүхий уг хоёр барилга нь нүүрсхүчлийн давхар ислийг бууруулж, өдөр тутамд 60 кг хүчилтөрөгчийг үйлдвэрлэн хотыг цэвэр агаараар хангах үүрэгтэй юм. “Босоо ой” цамхагт нийт 1,100 гаруй эрүүл, цэцэглэсэн мод, 2,500 орчим бут, сөөг болон тухайн орон нутгийн 23 ургамлыг суулгах аж.

   Нанжин Пукоу дүүрэгт баригдах 200м ба 108м өндөртэй уг хоёр барилгыг Хятадын өмнөд нутаг Жянсу мужид орчин үеийн архитектурын шийдлийг бий болгож, нөгөө талаар Янце гол эдийн засгийн бүсийг хөгжүүлэх зорилготойгоор байгуулж байгаа юм.



   Төрийн өмчит “Nanjing Yang Zi” компани нь энэхүү хос барилгыг байгуулж байгаа бөгөөд хөрөнгө оруулагчдынх нь жагсаалтад Италийн “Stefano Boeri Architetti” компани багтдаг аж. 200м өндөр барилгад нь оффис, ногоон архитектурын сургууль, дээвэр дээрх клубууд байрлах юм байна. Харин намханд нь буюу 108м өндөр барилгад нь “Hyatt” зочид буудлын 247 өрөө, усан бассейн, мөн дэлгүүр, зоогийн газрууд, хурлын танхимууд зэрэг үйлчилгээний хэсгүүд байрлах аж. Барилгын фасадыг даган сүлжилдсэн ургамал, бут зэрэг нь тагтнуудтай маш ойр байх тул хүмүүст ногоон байгалийнхаа дэргэд ажиллаж, амьдрах нөхцөлийг нь бүрдүүлж өгч байгаа юм.



   Цамхаг дээр байрлуулах 600 ширхэг өндөр мод, 500 ширхэг дунд зэргийн мод, давхарлан ургасан ургамал ногоонууд нь тухайн орчны агаарыг сэлгэж, шинэ цэнгэг агаар бэлэглэхэд хангалттай хүрэлцэнэ гэдгийг “Stefano Boeri Architetti” компанийнхан хэлжээ.

   Ногоон байгууламжаар дүүрэн энэхүү том цамхагууд нь зөвхөн Хятадад төдийгүй Азидаа анхных нь болж байгаа юм. Мэдээж бас сүүлийнх нь ч биш. Учир нь төслийг гүйцэтгэж буй архитектурын компанийнхан цаашид Шанхай, Гуйжоу, Шижяжуан, Лиужоу болон Чоншин зэрэг газруудад ийм төрлийн барилгуудыг барихаар төлөвлөөд байна. “Stefano Boeri Architetti” компани ирэх 4-р сард худалдаанд гаргах гэж буй “A Forest City” номондоо Хятадад гүйцэтгэж буй төслийнхөө санааг бичсэн байна.

   Нанжины ногоон цамхагууд 2018 онд бүрэн дуусч, ашиглалтад орох юм байна.