Нарны эрчим хүчээр ажилладаг цэвэршүүлэгч системийг ашиглан Энэтхэгийн цэвэр усны хомсдолтой нутагт амьдардаг иргэдийг анх удаа усаар хангах боломжтой боллоо. Тус улсад хэдэн арван сая хүн зөөврийн ус хэрэглэж, ус болон усны ариун цэврийн асуудлаас үүсдэг суулгалт, уушгины үрэвсэл зэрэг өвчнөөр жилд 600 мянган хүүхэд нас бардаг тухай ЮНИСЕФ-ийн тайланд дурдсан байдаг.

   Энэтхэгийн хүн амын 70 орчим хувь нь оршин суудаг алслагдмал бүс нутгуудад усан хангамжийн тал хувь нь тогтмол бохирдож, ямар нэгэн байдлаар хордож байдаг аж. Тус улсын засгийн газар гадаргын болон гол горхины усыг цэвэршүүлэхэд ихээхэн анхаарал хандуулдаг ч Шотланд дахь Эдинбургийн их сургуулийн эрдэмтэд усны бохирдлын эх үүсвэрийг үгүй хийж, урсгал усанд анхаарахыг зөвлөжээ.

   Дээрх эрдэмтэд химийн урвал үүсгэдэг гэрлийг ашигласан фотокатализатор материалтай хамт өндөр эрчим хүчний хэсгүүдийг өдөөх нарны гэрлээр энэхүү системийг бий болгодог ажээ. Эдгээр нь эргээд хүчилтөрөгчийн молекулуудыг идэвхжүүлж, нян болон органик нэгдлүүдийг устгах явцыг нь эрчимжүүлж өгдөг юм байна.

   Эдгээр материал нь ямар ч эрчим хүчний эх үүсвэр шаардахгүй учир бие даасан систем нь фотокатализаторыг бохир усны сав руу холбож, усыг уухад бэлэн болж цэвэрштэл нь нар руу өнцөгдүүлэн байрлуулах юм. Шаардлагатай тохиолдолд систем нь их хэмжээгээр нь шүүх шүүлтүүрийг хослуулан хэрэглэх боломжтой.

   Судлаачид таван сарын турш маш хурдацтай хэрэгжүүлсэн уг төслийг Энэтхэгийн Шинжлэх ухаан боловсрол, судалгааны хүрээлэнтэй хамтран, хамрах хүрээг нь өргөжүүлэхээр ажиллаж байгаа аж.

   Эдинбургийн их сургуулийн Химийн сургуулийн профессор Нейл Робертсон, “Энэтхэг судлаачидтайгаа хамтран бид дэлхий ертөнцөд сөрөг нөлөөгөө үзүүлэхийн зэрэгцээ үй олон хүнд тулгарч буй бэрхшээлийг нарны эрчим хүчийг ашиглан шийдвэрлэхээр зорьж байна” хэмээн ярьсан байна.