Барилгын салбарын төрийн байгууллага, аж ахуйн нэгж, компаниудын харилцаа холбоог сайжруулах, хүнд суртлыг арилгах, олон шат дамжлагат ажлыг хөнгөрүүлэх зорилгоор төрийн байгууллагуудын зарим чиг үүргийг төрийн бус байгууллагуудад шилжүүлэх талаар яригдаад даруй арван жил өнгөрчээ.
 
Энэ талаар 2008 онд Засгийн Газар 93-р тогтоолын хамтран ажиллах тухай гэрээ, 2010 онд Ерөнхий сайдын гаргасан төрийн зарим чиг үүргийг гэрээний үндсэн дээр ТББ-аар гүйцэтгүүлэх чиглэл баримтлан ажиллахыг тухайн асуудал эрхэлсэн ЗГ-ын гишүүдэд даалгасан 60-р тогтоол, мөн 2014 онд “Хот байгуулалтын  баримт бичиг, барилга байгууламжийн зураг төсөл боловсруулах, Барилгын ажил гүйцэтгэх, Өргөх байгууламж, түүний эд ангийн үйлдвэрлэл, угсралт, засвар үйлчилгээ эрхлэх хуулийн этгээдэд тусгай зөвшөөрөл олгох ажлыг барилгын салбарын төрийн бус байгууллагад гэрээний үндсэн дээр гүйцэтгүүлэх” 250-р тогтоол гэсэн шийдвэрүүд тус тус гараад байсан юм. Гэсэн ч өнөөдрийг хүртэл эдгээр шийдвэр тогтоол, хамтын ажиллагааны гэрээ хэрэгжсэнгүй. Энэ тухайд учир мэдэх хүмүүсээс асуухад тодорхой хариулт олдсонгүй. “Зогсонги байдалтай байгаа, тодорхой мэдээлэл байхгүй байна” гэсэн ойлгомжгүй хариултыг өгч байна.