Байгаль дэлхийг чимэн сүндэрлэдэг босоо ойг амьдралд бодитоор хэрэгжүүлж, тэр ч байтугай хотын төвд байгуулж чадсан нэгэн сайн жишээ бол “Боско Вертикаль” юм. Италийн Милан хотноо Изола дүүрэгт 300 000 м2 талбайд баригдсан тус цогцолбор нь байгаль орчинд ээлтэй, дэвшилтэт шинэ технологийг ашиглан барилгад хамгийн том ногоон байгууламжийг бий болгож чадсан бүтээн байгуулалт билээ.

  “Боско Вертикаль” гэдэг нь Босоо ой гэсэн утгатай бөгөөд төслийг жинхэнэ утгаар нь ой мэт харагдуулахын тулд хоёр барилгын эргэн тойрныг ургамал, модоор бүрхжээ. Цогцолборын “Д” буюу 17 давхар барилга нь 78 м, “Е” буюу 24 давхар барилга нь 111 метрийн өндөртэй.  





  “Жардино ди Порта Нова” цэцэрлэгт хүрээлэнд байрлах энэхүү цогцолборт 1 000 гаруй төрлийн ургамал ногоо, мод бут тарьсан бөгөөд энэ нь хүрээлж буй ногоон орчиндоо ууссан мэт сэтгэгдэл төрүүлэм зохицолтой.

  Энэ нь оршин суугчиддаа зориулан нэгдсэн харуул хамгаалалттай аюулгүй, тав тухтай, сүүлийн үеийн шинэ технологийг нэвтрүүлсэн атлаа байгаль дунд амьдарч буй мэт шинэ хэв маягийг бий болгож чадсанаараа ихээхэн давуу талтай.   

  “Боско Вертикаль”-ийн лобби хэсэг нь том шилэн ханануудтай учир гоёмсог цэцэрлэгт хүрээлэн дотор байгаа мэт сэтгэгдэл төрүүлнэ. Зочдын хүлээлгийн танхим, чөлөөт цагаа өнгөрөөх хэсэг, уулзалтын танхимуудын интерьер засалд нь орчинд дулаан уур амьсгалыг бүрдүүлэх тааламжтай өнгө бүхий байгалийн гаралтай бүтээгдэхүүнүүдийг ашигласан байдаг.





  Хос барилга нь олон төрлийн засал чимэглэл бүхий, талбайн хэмжээний өргөн сонголттой орон сууцуудыг санал болгодог. Хүний бүхий л хэрэгцээ шаардлагыг хангаж чадахуйц 60 м2 хоёр өрөөнөөс эхлээд хоёр давхар бүхий 495 м2 хүртэлх байрнуудаас бүрджээ.   

  Террас болон тагтнууд нь оршин суугчиддаа уудам ногоон байгууламжаа сэтгэл тэнэгэр харах үнэтэй боломжийг бэлэглэхээс гадна сэтгэл татам олон өнгийн модлог болон цэцэгт, бутлаг мянга гаруй ургамлын гоо үзэмжийг гайхуулсан гайхалтай орчинд, байгалийн цэвэр агаарт буй мэт сэтгэгдэл төрүүлэх аж.

  “Боско Вертикаль”-ийн 3 м хүртэлх өргөн том террасууд, цэвэр агаарт байрлах цэлгэр ногоон орчинд гэр бүл, найз нөхдийн хамт зоог барих, эсвэл тайван орчинд ном унших ч юм уу, намуухан цагийг өнгөрүүлхэд тохиромжтой.   





  Хотын төвд байрлах энэхүү хоёр цамхаг нь зөвхөн хотын өнгө үзэмжийг чимэх зориулалттай бус, байгаль орчинд ээлтэй орчин үеийн шилдэг технологиудыг ашиглан оршин суугчдад эрүүл ногоон, амьдралын орчинг бэлэглэдэг.  

  Энэ төсөл нь барилга тус бүрд нарны эрчим хүчний 500м2 самбар, зуны улиралд агаар хөргөх, өвлийн улиралд халаалтын зориулалтаар ашиглах газрын гүний дулааны насос, иж бүрэн узель, орон сууцны хамгаалалтын болон өдөр тутмын хэрэглээний ухаалаг систем гээд шинэ технологи, байгальд ээлтэй тав тухтай орчны нэгдмэл цогц бүтээл болсон.    

  Хуучны орон сууц, барилгын хэв маягийг өөрчилж, шинэ ногоон орчинд тэмүүлэх амьдралын үлгэр жишээ, гайхалтай содон шийдэл болж чадсаныг өдгөө бусад төслүүдэд нэвтрүүлэх гэж буй төлөвлөлтүүдээс харж болно.