Тоглоомыг бодит бүтээн байгуулалт болгон биелүүлэх гайхалтай санааг Дани улсын Биллунд хотноо хэрэгжүүлэхээр болжээ. “Bjarke Ingel Group”-ын гаргасан загварын дагуу хамгийн том ЛЕГО барилгыг тус тоглоомын брэндийн хотхонд энэ 9 дүгээр сарын 28-ны өдөр ашиглалтад оруулахаар болсон байна.
ЛЕГО тоосгоор барих уг барилгад тус тоглоомтой холбоотой сэдвээр үзэсгэлэн, арга хэмжээнүүдийг явуулах аж. Биллунд хотноо байрлах энэхүү барилгыг барихын тулд ЛЕГО тоосгыг судлах, турших, хийх ажилд нийтдээ 7 жилийн хугацаа зарцуулжээ.

   12 мянган м.кв талбайт бүхий тус төвд жилдээ 250 мянган хүн үнэ төлбөргүйгээр зочилж, ЛЕГО тоглоомтой хамааралтай бүхий л арга хэмжээнд оролцох боломжтой юм байна. Энэ нь олон нийтэд нээлттэй байж, төрөл бүрийн арга хэмжээг тогтмол явуулж байх аж. Тухайлбал, тасалбаргүй зочид дээврийн террас, дэлгүүр, зоогийн газрууд, тоглоомын төвүүдээр үйлчлүүлэх боломжтой байх гэнэ.



   Харин тасалбартай зочдод зориулагдсан хэсэг нь дөрвөн өнгийн код бүхий бүс байх бөгөөд тэднийг “Тоглонгоо суралцах” бүхий л боломжоор хангах юм.
Нийт 21 төрлийн хэмжээ бүхий ЛЕГО тоосгыг давхарлаж барьсан уг барилга нь тус брэндийн тоглоомоор зугаацах, шинийг сэтгэх бүтээлч сэтгэлгээг хөгжүүлэхэд гол анхаарлаа хандуулах болно гэдгийг зохион байгуулагчдынх нь зүгээс мэдэгдлээ.



   Мөн байгууламжийн гол хэсэгт байх 2 мянган м.кв талбайд байгалийн гэрлийг түлхүү тусгаж, олон нийтийн зорчих, зугаалах дээврийн террасыг бат бөх байлгахад анхаарч байгаа аж. Фасадыг бүрсэн барзгар шавар хавтан нь барилгыг яг жинхэнэ ЛЕГО блокоор барьсан мэт харагдуулах юм байна.

ЛЕГО төвийн төлбөртэй тасалбар ирэх 6 дугаар сараас худалдаанд гарах ажээ.