Гүрж улсын нийслэл Тбилис хотноо хоёр аварга металл хоолой сүндэрлэх болжээ. Энэ бол тус хотод шинээр баригдсан Хөгжимт театр буюу концертын танхимын барилга юм. Тун удахгүй ашиглалтад орох гэж буй уг барилгын загварыг архитектор Массимилиано болон Дориана Фуксас нар гаргажээ.

   Төсөл нь Тбилис хотын ногоон бүс болох Рхике цэцэрлэгт хүрээлэнгийн бүст, Кура голын дагуу хуучин хотыг чимэн сүндэрлэж байгаа юм. Аварга том хоолой мэт хоорондоо холбогдсон барилгын хоёр жигүүрийн дотор талд байгалийн гэрэл тусах боломж нь маш бага аж. Хээ хуар бүхий төмөр хийцтэй тус барилгын фасадыг шилэн хавтангаар гүйцэтгэсэн бөгөөд түүгээр өдрийн цагт нарны гэрэл тусч, тэр нь дотоод заслын шийдлийг тодотгож өгөх аж.



   Уг хөгжимт театрыг Италийн нэрт архитектор Мишель Де Луччигийн 2010 онд гүйцэтгэсэн Энхтайвны гүүрийг чиглүүлэн байрлуулсан нь бас их онцлогтой юм. Барилгын хойд хэсэгт байх хөгжимт театрын танхим нь 566 хүний суудалтай, үүдний өрөө, хэд хэдэн байгууламжтай, агуулах болон техникийн өрөөнүүдтэй юм байна. Харин үзэсгэлэнгийн танхим нь төв хаалгаар оронгуут байх бөгөөд гудамжаар явж буй хүмүүст нээлттэй байхаар зохион байгуулагджээ.