Дээвэр дээр тохилог, тансаг амины орон сууц барих гайхалтай санааг Хятадад хэрэгжүүлжээ. Тус улсын Жужао дахь Жьютиан олон улсын худалдааны төвийн дээвэр дээр ус, цахилгаан, дулааныг нь иж бүрнээр нь шийдсэн 4 амины орон сууцыг барьж, тохижуулсан байна.

   Эдгээр байшингийн талаарх мэдээллийг интернэтээр цацсан даруйд олон нийтийн анхаарлыг ихээхэн татаж, дамлан худалдаалах хүсэлтэй хүмүүс ч гарч иржээ.

   Хятадын өдөр тутмын сонины мэдээлснээр, тус барилгад худалдааны төвийн үл хөдлөх хөрөнгийн менежментийн 160 гаруй ажилтны оффис байрлах аж. Холбогдох албаны ажилтнууд нь тус барилгын дээвэр дээрх амины орон сууцнуудад зохих зөвшөөрлийг нь олгосон байна.



   2008 онд гаргасан засгийн газрын шийдвэрийн дагуу Жужоу болон бусад 33 хотыг “үндэсний хэмжээний цэцэрлэгжүүлсэн хот” болгохоор баталсан юм. Үүний хүрээнд, дээрх хотуудад сүүлийн 20 жилд баригдсан 12 давхраас доош, 45 м-ээс намхан барилгуудын дээвэр дээр амьд ургамал тарьж цэцэрлэгжүүлэн, хотын цэвэр агаарыг сайжруулж, өнгө үзэмжинд чимэг нэмж байх шийдвэрийг 2011 онд гаргажээ.

Орон зайг гайхалтайгаар ашиглаж чадсан энэхүү жишээг дэлхийн бусад хотуудад ч хэрэгжүүлэх гэж хичээх болжээ.