Швейцарь бол үзэсгэлэнтэй байгаль, жуулчдыг татах өвөрмөц газруудаараа дэлхийд алдартай улс. Тэгвэл энэ оронд байгальд хайртай аялагчдын очихыг хүсдэг хамгийн хачирхалтай 11 газрын нэгт Монгол гэр бүхий амралтын газар багтдаг аж.

   “Rochers-de-Naye” хэмээх газарт байрлах энэ амралт нь Швейцарийн сүрлэг өндөр уулсын нэгт буюу Альпийн нуруунд 2042 метрийн өндөрт байрладаг гэнэ. Галт тэргээр 54 минутын хугацаанд явж хүрдэг тус амралтын газарт нийт таван Монгол гэр байх бөгөөд хамгийн томд нь найман хүн хоноглох боломжтой аж. Энэ нь жилийн дөрвөн улирлын турш аялагчид, жуулчдыг хүлээн авдаг юм байна.



   Байгаль дэлхийдээ ойр, хүрээлэн буй орчинд ээлтэй, хүйтэн болоод эрс тэс уур амьсгалд тохиромжтой, хар шуурганд тэсвэртэй гэж үздэгээс Монгол гэр, түүнээс жишээ авсан дугуй хэлбэрт сууцнуудыг дэлхийн улс орнууд, ялангуяа Европын улсууд өргөнөөр ашиглах болсон билээ.



   Тиймээс Швейцарийн хачирхалтай гэж тооцогдож буй бусад амралтын газруудад мөн л Монгол гэрийг санагдуулам дугуй хэлбэр бүхий сууцтай бааз, майханд хоноглодог болон усан дээр, өндөр модон дээр байрлах дугуй байшинтай газрууд багтжээ.