Тэртээ 1973 онд орхигдсон цементийн хуучин үйлдвэрийн барилгыг гайхалтайгаар ашиглах санааг Испанийн архитектор Рикардо Бофиль гаргажээ. Тэрээр өөрийн худалдан авсан энэхүү тархмал байрлалтай хаягдал үйлдвэрийн байгууламжийг нутгийн гар урчуудын хамтаар өөрчилж, архитектур, интерьерийн орчин үеийн шийдлийг тусгасан тансаг сууц болгон зассан юм.

   Испанийн Каталонияд байрлах уг байгууламж зөвхөн харагдах байдлаасаа гайхалтай болоод зогссонгүй, архитектор хүний хувьд уран бүтээлээ туурвих таатай орчныг бүрдүүлсэн ажлын байр, тохилог гэр нь болж чадсан байна.



   40 жилийн турш хаягдсан энэ барилгыг үнэхээр нүд булаам жинхэнэ урлагийн бүтээл болгожээ. Барилгын бетон фасадыг илүү таатай харагдуулахын тулд ургамал ногоо, бут сөөг тарин цэцэрлэгжүүлж, ороонги ургамлаар ханыг чимжээ.



   Засвар хийж өөрчилсөн байр нь архитектор Бофилийн санаж, мөрөөдөж байснаас нь илүү сайхан барилга болсныг тэрээр бахдан ярих дуртай. Энд түүний архитектурын компани, хурал болон үзэсгэлэнгийн танхим, загварын байр, цэцэрлэг, архивийн өрөөнүүд байрладаг.



   Тааз хүрсэн өндөр цонхнууд нь өрөө тасалгаануудад байгалийн гэрэл хангалттай нэвтрэх боломжийг олгоно. Өрөөнд нэвт тусах нарны гэрэл нь интерьерийн онцлогийг илүү тодотгож өгч байгаа аж. Байгууламж бүхэлдээ бетоноос бүтсэн тул түүний хүйтэн, таагүй мэдрэмжийг үгүй хийхийн тулд интерьер заслыг маш сайн хийсэн байна. Ихэвчлэн цагаан болон шаргал өнгийн тавилгуудыг хөшиг, ханын өнгөтэй зохицуулан тохижуулжээ.



   Рикардо Бофиль, “Би энэ төслөө үргэлж дуусаагүй ажил мэт чигээр нь байлгаж, шинийг эрэлхийлсээр байх болно” хэмээн ярьжээ.