Барилгын салбарт хамгийн сүүлд нэвтрээд байгаа 3D технологийг хамгийн өндөр байшинд ашигласан анхны тохиолдол удахгүй бүртгэгдэх гэж байна. Дубай хотноо байрладаг “Cazza” компани Арабын Нэгдсэн Эмират улсад 3D хэвлэгч технологиор анхны цамхагаа барихаар зорьж байгаа аж. Тэд өргөгч цамхаг бүхий хэвлэгч гэгдэх энэхүү шинэ технологид тохируулан шинэ барилгын зураг төсөл, төлөвлөлтийг гаргах юм.

   Гэхдээ энэхүү цамхагийн их биеийг хэвлэгч технологиор гаргахдаа, 80 метрээс дээш өндөртэй 3D технологийн барилга барихад зориулагдсан загварыг ашиглах гэнэ. Гэхдээ одоогоор тус цамхагийн өндөр хэдэн метр байх нь тодорхойгүй байгаа.

   Тус компанийн захирал Крис Келсигийн ярьснаар, тэд анх компанийнхаа үйл ажиллагааг эхлүүлж байхдаа намхан буюу амины орон сууцнуудыг 3D технологиор барихад гол анхаарлаа хандуулдаг байсан боловч захиалагч компаниуд энэ технологиор өндөр барилга бариулах талаар санал болгожээ. Үүний дагуу “Cazza”-ийнхан технологио өндөр барилгад тохируулан өөрчлөхөөр шийдсэн байна.

   Цамхаган барилгад хэрэгтэй бүхий л гол хийц бүтээцийг кранан хэвлэгчээр нэг бүрчлэн гаргах ажээ. Энэхүү барилгын арга технологи нь барилгын бусад хэсгийг ч гүйцээж барихад нөлөөлөх юм. Механик инженер Хавиер Хернандын хэлснээр энэ төрлийн технологийн барилгыг барихад ямар ч материал ашиглах боломжтой гэнэ. Ялангуяа төмөр болон бетон гэх мэт хүссэн барилгын материалаа ашиглаж болох аж.

   Компанийн үйл ажиллагаа эрхэлсэн захирал Фернандо Де Лос Риос энэ талаар, “Бид суурийн нүх ухахаас авахуулаад өргөгч цамхаг хүртэл ашиглах шаардлагагүй боллоо. Кранан хэвлэгч систем нь одоо ашиглагдаж буй өргөгч цамхагуудтай зохицон ажиллах боломжтой технологи юм. Бүрэн хавтгай гадаргууг бий болгохын тулд давхаргын гөлгөр системдээ салхины өндөр хурдыг тохируулсан шинэ онцлогийг энэ технологид нэвтрүүлсэн. Энэ барилгыг гаднаас нь хараад хэн ч 3D барилга гэж мэдэхгүй” хэмээн ярьжээ.

   “Cazza” компани богино хугацаанд өртөг багатай бөгөөд байгаль орчинд ээлтэй, хог хаягдал багатай барилгын ажил гүйцэтгэхийн тулд зөөврийн 3D хэвлэгч роботуудыг ашиглах юм байна.

   Крис Келси, “Шинэхэн нэвтрүүлж буй энэ технологиороо бид урьд өмнө байгаагүй архитектурын хувьд бүрэн төгс бүхий цогц барилгыг барьж болдгийг харуулахыг зорьж байна. Эдийн засаг, цаг хугацааны хувьд асар хэмнэлттэй энэ технологи биднийг үйлдвэрлэлийн шинэ шатанд гаргаж чадна” хэмээн өгүүлжээ.

   Одоогоор “Cazza” компаниас цамхагийн барилгын ажлыг хэзээ эхлүүлэх талаар мэдэгдээгүй байна.