Эрчим хүчний салбар өнгөрсөн онд гурван тэрбум төгрөгийн ашигтай ажиллажээ. татварын дараах тайланг тооцсон дүнгээр ийм хэмжээний ашиг олсныг Эрчим хүчний зохицуулах хорооноос мэдээллээ. Тус салбарын өр төлбөр өнгөрсөн онд 24.8 тэрбум төгрөгөөр буурсан. Харин балансын алдагдал 23.7, үйл ажиллагааны зардал нь 27.3 тэрбум төгрөгөөр тус тус хумигджээ.

Монгол Улсын ОХУ-аас импортлосон эрчим хүчний хэмжээ энэ хугацаанд 36 хувиар буурсан. Мөн дотоодын цахилгаан түгээлтийн алдагдал ч 0.2 нэгжээр буурчээ. Эрчим хүчний тусгай зөвшөөрөл эзэмшигч компаниудын зардлын өсөлт саарсан байна. Тодруулбал, 2014 онд 14,5 хувьд хүрч байсан бол 2015 онд 11,2 хувь болж удааширав. 

Тус салбарын нөхцөл байдал ийн сайжирсныг холбогдох мэргэжилтнүүд 2013 оноос үе шаттай үнэ тарифыг чөлөөлж, зах зээлийн горимд шилжүүлсэн, мөн тусгай зөвшөөрөлтэй компаниудын менежментийг боловсронгуй болгож, техник эдийн засгийн үзүүлэлтийг хянах ажлууд ч ар араасаа хийгдэж байгаа хэмээн тайлбарлав.