Манай улсын нийт усны нөөцийн 80 гаруй хувийг гадаргын, 20 хүрэхгүй хувийг гүний ус эзэлдэг, усны нөөц багатай орны тоонд багтдаг. Харамсалтай нь хэрэглээний усныхаа 85 хувийг газрын гүний усаар хангадаг. Энэ тогтолцоог халахад төр, хувийн хэвшлийн хамтын ажиллагаа, түншлэлийн механизмыг хөгжүүлэх шаардлагатай байна.

           "Дэлхийн усны өдөр"-өөр МҮХАҮТ-д "Усны хомсдол, хүн амын ус хангамжийн асуудал" сэдэвт форум зохион байгуулагдав. Тогтвортой хөгжлийн бодлогод усны асуудал хэрхэн тусгагдсан, ус хэмнэх, саарал усыг эдийн засгийн эргэлтэд оруулах, ус ашигласны төлбөр тооцоог компани, ААН-үүд, хувийн хэвшлийнхэнд сурталчлан таниулахад чиглэсэн арга хэмжээ болсон юм.

Энэхүү форумаас эхлэн Цэнгэг усны нөөц байгаль хамгаалах төв, JCI конгресс салбар байгууллага, УСУГ, МҮХАҮТ-тай хамтран "Цэнхэр алт" төслийг хэрэгжүүлж байна. Уг төслийн хүрээнд форум зохиож, үүгээр дамжуулан усны ач холбогдлыг олон нийтэд таниулж, усыг зүй зохистой хэрэглэх дадал зуршлыг бий болгоход анхаарч ажиллах юм.