Тайландын нэгэн лам сэргээгдэх эрчим хүчийг ашигласан сургуулийн барилга байгуулахаар санаачилжээ. “Солар Монк” нэрээрээ алдаршсан лам багш Пракрувимолпаняахун нь  “Sisaengtham” гэх энэхүү сургуулийн органик ургамал ногоо тариалах цэцэрлэгт хүрээлэнтэй, нарны зайн цахилгаан үүсгүүртэй барилгыг бариулахын тулд өөрийн гэрийг худалдаж, санхүүжүүлж байгаа аж. Тайландын зүүн хойд нутагт орших Убон Ратчатхани мужид ой модон дунд байрлах уг сургууль нь бүхэлдээ нарны эрчим хүчээр ажиллах бөгөөд төвийн шугам сүлжээнд огт холбохгүйгээр сар тутамд нэгхэн долларын цахилгааны зардал гаргах гэнэ.

     2010 онд байгуулагдсан тус сургууль нь сурагчдын бие даан суралцах чадвар, олон нийтийн ажил хийх болон унших, бичих зэрэг академик хичээлүүдийг зааж сургадаг аж. Шинээр байгуулагдах сургуульдаа сурагчид ургамал ногоо ургуулж, органик үйлдвэрлэл явуулах гэх мэтээр байгаль орчинд ээлтэй зүйлсийг хийж суралцах юм байна.