Орон сууцны ипотекийн зээлийг хэвийн үргэлжлүүлэх, мөн зээлийн хүүг байршлаас хамааруулан 5 хувь болгон бууруулах шийдвэр гарсан. Үүнтэй холбоотойгоор зарим банкууд иргэдийн ипотекийн зээлийн хүсэлтийг хүлээн авч байгаа ч, санхүүжилтийн асуудлаас болоод түр зогссон тохиолдол ч байна.

     Одоогийн байдлаар арилжааны банкуудаас ХААН, Голомт, Улаанбаатар банкууд ипотекийн 8 хувь, 5 хувийн зээлүүдийг хэвийн олгож эхлээд байна. Төрийн банк ипотекийн зээл олгож байгаа ч, 5 хувийн зээлийг олгох асуудлыг судалж байгаа гэсэн хариу өгсөн юм. Харин Худалдаа хөгжлийн банк, Хас банкны хувьд санхүүжилтийн эх үүсвэр хүлээгдэж, Капитал банк ипотекийн зээлийг үргэлжлүүлэн олгох асуудал дээр шийдвэр хараахан гаргаагүй байгаа гэсэн хариуг мэдэгдлээ.

  Хүн амын хөгжил, нийгмийн хамгааллын сайд, Монголбанкны ерөнхийлөгчийн 2016 оны 3 дугаар сарын 4-ний өдрийн хамтарсан тушаалаар “”Орон сууцны ипотекийн зээлийн зарим нөхцөл””-ийг шинэчлэн тогтоож, Монголбанкны ерөнхийлөгчийн 2016 оны 3 дугаар сарын 11-ний өдрийн тушаалаар “Орон сууцны ипотекийн санхүүжилтийн журам”-д холбогдох өөрчлөлтүүд орсон билээ. Тиймээс дээр дурдсан банкууд 8 хувийн ипотекийн зээлийг үргэлжлүүлж, 5 хувийн зээлийг журамд заасны дагуу шинэ нөхцөлөөр олгож эхэлсэн байна.

     Монголбанкнаас гаргасан мэдээллээр, энэ сарын 15-ны өдрийн байдлаар шинэ орон сууц худалдан авахыг хүссэн иргэдээс 8 хувийн зээлээр 698 иргэнд 43.1 тэрбум төгрөгийн зээлийг шинээр олгожээ. Харин Улаанбаатар хотын гэр хорооллын дахин төлөвлөлтөд хамрагдах, мөн хотын алслагдсан Багахангай, Багануур, Налайх дүүргүүд, шинэ суурьшлын бүс болон 21 аймгийн нутаг дэвсгэрт байгаа орон сууцыг худалдан авахыг хүссэн иргэдээс 5 хувийн ипотекийн зээлээр 81 иргэнд 2.4 тэрбум төгрөгийн зээлийг шинээр олгохоор шийдвэрлэжээ. Өмнө нь орон сууцны ипотекийн зээлээр дурдсан байршлуудад байр авсан 3085 зээлдэгчийн 125.3 тэрбум төгрөгийн зээлийг 8-аас 5 хувь руу шилжүүлсэн байна.