Өчигдөр хуульч О.Батхүү "УИХ, Засгийн газрын зарим шийдвэр, хууль зөрчиж байна" гэж үзэж, Үндсэн хуулийн цэцэд хандахаа сэтгүүлчдэд илэрхийлсэн юм.

Түүний хэлж буйгаар, өнгөрсөн оны арванхоёрдугаар сард Иргэний хуульд өөрчлөлт оруулж, зарим хэсгийг нь хүчингүй болгосон нь иргэд нэгэндээ мөнгө зээлэх нь хууль бус болсон. Хүн өөрийнхөө эд хөрөнгийг захиран зарцуулах эрхтэй. Мөн 21 аймаг, алслагдсан гурван дүүрэг, гэр хорооллын дахин төлөвлөлтийн бүсэд барьсан орон сууцыг дахин төлөвлөлтөд хамруулахаар тогтсон. Үүнийг тэрээр "Зээлийн санхүүжилт Ирээдүйн тэтгэвэрийн сангаас гарна. Энэ бол татвар төлөгчийн мөнгө. Энэ мөнгийг дахин хуваарилахдаа иргэдийг ялгаварлаж байна. Манай улсын хүн амын 50 хувь нь хотод амьдардаг. Тэднийг ялгаварлаж буй нь Үндсэн хууль зөрчсөн үйлдэл" хэмээн мэдэгдлээ.

          Дээрх асуудал хэрхэн шийдэгдэх нь тодорхойгүй ч таван хувийн зээлд хамрагдсанаар нэг өрх сард 150-300 мянган төгрөг хэмнэх боломжтой юм. Барилгын салбарыг давхар дэмжсэн бодлого юм бол дэмжсэн шиг дэмжих нь зүйтэй болов уу. Хотын А болон Б зэрэглэлийн бүсэд маш олон борлогдохоо хүлээж буй байр байгааг төр бас бодох л хэрэгтэй. Энд дахин шинээр барилга барих талаар яриагүй шүү дээ. Эцсийн эцэст орон сууцны зээл бол хамгийн найдвартай зээл. Хүн орон байрнаасаа хэзээ ч салахгүй.  Тиймээс энэ зээл хэзээ ч эрсдэлд орохгүй гэж үзэж болно.