МҮХАҮТанхимаас долоо хоног бүр тогтмол явуулдаг “Business Breakfast” ажил хэрэгч өглөөний уулзалтыг Барилга, хот байгуулалтын сайд З.Баянсэлэнгэ, холбогдох албаны хүмүүс болон бизнес эрхлэгчдийн дунд зохион байгууллаа. Уулзалтаар хувийн хэвшлийнхэнд тулгарч буй асуудал, тэдэнд төрөөс болон арилжааны банкуудаас ямар дэмжлэг туслалцаа хэрэгтэй байгаа талаар санал бодлоо солилцлоо. Бизнес эрхлэгчдийн нийтлэг хүсч буй санал санаачилгууд, хөндөж буй сэдвүүд нь үндсэндээ хоорондоо уялдаа холбоотой асуудлууд байсан гэж хэлж болно. Тухайлбал,

- Арилжааны банкуудын бизнес эрхлэгчдэд олгож буй зээлийн нөхцөл хатуу
- Төрөөс аж ахуйн нэгж байгууллагуудаар гүйцэтгүүлсэн ажлын хөлс, төлбөрийг өгөхгүй хойшлуулснаас үүддэг хүндрэл бэрхшээл
- Барилгын салбарын инженер техникийн ажилтнууд, мэргэжилтэй ажиллах хүчний боловсрол, ёс суртахуун, үндсэн мэдлэгийн түвшин тааруугаас тэдгээрийн боловсрол мэдлэгт анхаарах, сургалтыг чанаржуулах,
- НӨАТ-ын асуудал
- Дотоодын барилгын материалын үнэ ханш өндөр байдгаас барилгын ажилд авч ашиглах боломжгүй байдаг талаар
- Төр, хувийн хэвшил, арилжааны банкуудын хоорондоо уялдаа холбоотой ажиллаж чаддаггүй тухай
- Татварын дарамт

Зэрэг олон асуудлыг хувийн хэвшлийнхэн хөндөн, тэдний бизнес эрхлэх таатай орчныг бүрдүүлэхэд онцгой анхаарал хандуулж, ялангуяа арилжааны банкуудтай үүсч буй хүндрэлүүдийг шийдэж өгөхийг хүссэн юм.



     Уулзалтад ирсэн бизнес эрхлэгчдийн төлөөллийн гол хөндөж буй сэдэв санхүүгийн бэрхшээл, түүнээс гарахад төр болон арилжааны банкуудын ойлголцол, хамтын ажиллагаа хэрэгтэй гэдгийг онцолж байсан.

     Иймд БХБ-ын сайд З.Баянсэлэнгэ найм хоногийн дараа буюу 4-р сарын 27-ны өдөр төрийн болон төрийн бус мэргэжлийн байгууллагуудын удирдлагууд, бизнес эрхлэгчид, арилжааны банкуудын төлөөллийг оролцуулсан уулзалт зохион байгуулахаар санаачиллаа. Тус уулзалтаар ипотекийн болон хувийн хэвшлийнхэнд олгож буй зээлийн нөхцөл, бэрхшээлүүд, түүнээс гарах арга замын талаар ярилцахаар болсон юм.