Өнөөдөр Монголын Барилгын Үндэсний Ассоциаци III дахь удаагийн чуулганаа зохион байгуулж байна. “Сайн засаглалын төлөө хамтдаа” уриан дор МБҮА-ийн 150 гишүүд болон салбарын өндөр мэргэжилтэн, шийдвэр гаргагч, бодлого боловсруулагчид хуралдлаа. Хуралдаанаар Ардчилсан нийгэм дэх бизнес эрхлэгчдийн ТББ-ын үүрэг роль, эдийн засгийн хямралын үеийн үл хөдлөх хөдлөх хөрөнгийн зах зээл-барилгын салбар гэсэн сэдвээр илтгэл тавигдсан юм. Үүнээс гадна ассоциацийн дүрмийг шинэчлэн батлах, удирдах зөвлөл, хяналтын зөвлөл сонгох мөн өнгөрсөн 2 жилийн үйл ажиллагааны тайлан, дунд хугацааны статеги төлөвлөгөөг хэлэлцэн батлах аж.

         Эдийн засагч, нийтлэлч Д.Жаргалсайхан Монгол Улсын өр, бондын талаар хатуухан шүүмж хэллээ. Товчоор,
Төсвийн алдагдал 4 жил дарааллан гарсан, аливаа улс, компанийн эдийн засгийн өсөлт 2 улирал дахин өсөлтгүй гарах нь байж боломгүй явдал. Төр өр зээлээ төлөх боломжтой гэж байгаагаас “хэрхэн” төлж барагдуулах талаар яригдахгүй байна. Төлбөр гэдэг өр, орлого хоёрын харьцаа. АНУ-д 2009 онд анх удаа орон сууц худалдан авч байгаа иргэнд зээл олгож, татвараас чөлөөлсөн. Үүний үр дүнд АНУ-ын банкны систем үндсэндээ уналтанд орсон. Яг энэ загварчлал одоогийн манай орон сууцны ипотекийн зээлтэй төстэй.
Өнөөгийн хямралтай нөхцөлд компаниуд орон сууцны үнээ буулгахаас өөр арга зам байхгүй.
Үл хөдлөх хөрөнгө, барилгын салбарыг тусад авч явах ёстой. Үл хөдлөх хөрөнгийн үнэлгээний системийг байгуулах явдал чухал нөлөөтэй. Манай улсад барилгын компани, үл хөдлөх хөрөнгийг нэг хүн эрхэлж байгаа учир өнөөгийн эдийн засгийн байдал хямралд орсон. Өөрөөр хэлбэл, барилга зураг төсөл байхаас баригдаж дуустал нь бүгдийг өөрсдөө хийдгээс хяналтгүй байна. Гадны улсад “Developers”-д барилгаа хариуцуулж, Нийгмийн даатгал болон захиалагчид нь хяналтаа тавьж байдаг.
Түүнчлэн барилгын компаниуд суурь зарчим, эдийн засгаа сайжируулах цор ганц арга зам нь “Чанар” гэдгийг онцлоод дотоод дүрэм, журмаа баримталж, ёс зүйн болон бусад хариуцлага тооцоод эхлэх хэрэгтэй гэж байлаа.