Өнөөдөр “Барилга Экспо-2016” Олон улсын үзэсгэлэнгийн “Барилгын материал, дэвшилтэт, технологи”-ийн нээлтийн үйл ажиллагаа боллоо. Нээлтийн тууз хайчлах ёслолд БХБЯ-ны Төрийн нарийн бичгийн дарга М.Болортуяа, тус яамны газрын дарга нар, МҮХАҮТ-ын Ерөнхийлөгч Б.Лхагважав, Барилгын Хөгжлийн Үндэсний Нэгдсэн Төвийн ТУЗ-н дарга Г.Мягмар  болон бусад Төрийн бус мэргэжлийн байгууллагуудын төлөөлөл оролцов.

Энэ жилийн үзэсгэлэн яармагийн үйл ажиллагааг дэмжин Барилга Хот Байгуулалтын Яам, Нийслэлийн Засаг Даргын Тамгын газар, Орон сууцны бирж болон Ерөнхий Ивээн тэтгэгчээр оролцож байгаа "NCD group", "Эм Си Лог Хаус" ХХК  хамтран ажиллаж байна.
 
          Үзэсгэлэнгийн зохион байгуулах хорооны дарга Г.Батсүх, “Барилга экспо-2016” Олон улсын үзэсгэлэн яармагийн оролцогч байгууллагууд, хүрэлцэн ирсэн хүндэт зочдод талархал илэрхийлэн, жил бүр хүрээгээ тэлж буй барилгын экспод дэлхийн 10 гаруй орны тэргүүлэгч компаниуд, Монгол Улсын Үндэсний шилдэг аж ахуйн нэгжийн төлөөлөл болсон 250 орчим байгууллага оролцож, өөрсдийн дэвшилтэт техник технологи, шинэлэг барилгын материал, орон сууц, бүтээгдэхүүн үйлчилгээгээ танилцуулж байгааг онцолсон. Мөн салбарын эрдэмтэн мэргэдийн барилгын материалын үйлдвэрлэлийн чиглэлээр хийж байгаа эрдэм шинжилгээ, судалгааны ажил бүтээлээ танилцуулах “Материал судлал ба орчин үе” эрдэм шинжилгээний бага хурлыг зохион байгуулж байна. Энэ чиглэлийн сургалт, семинар, дэвшилтэт технологуудын танилцуулга зэрэг олон үйл ажиллагааг нэг дор цогцлоож буйгаараа онцлогтой гэв.
 
        Үзэсгэлэн зохион байгуулах хорооны үзэгч, зочдод бэлтгэсэн гэнэтийн бэлэг нь “Войс хамтлаг” болон барилгачин залуу А.Отгонбаяр нар хүрэлцэн ирж, ая дуу өргөсөн явдал байлаа.
 
Барилгын материал, дэвшилтэт технологи үзэсгэлэн таван сарын нэгнийг хүртэл үргэлжилэх тул сонирхогч та бүхнийг хүрэлцэн ирэхийг урьж байна.