Яг одоо “Барилгын салбарын хөдөлмөрийн аюулгүй байдал, эрүүл ахуйн үндэсний IV зөвлөгөөн”  болж байна.

Зөвлөгөөнд БХБ-ын сайд З.Баянсэлэнгэ, УИХ-ын орон тооны бус зөвлөх Г.Байгальмаа, БХТ-ын дарга Б.Баярсайхан болон бусад албаны хүмүүс, орон нутгийн төлөөлөл болсон 320 гаруй иргэд хуралдаж байна. Уг зөвлөгөөнийг салбарын 90 жилийн ойн хүрээнд БХБЯ, БХТ, НМХГ, МХЕГ, МБХ, НДЕГазраас зохион байгуулж байгаа бөгөөд энэ удаад нийгмийн даатгалын дүрэм, журамд өөрчлөлт орсонтой холбоотойгоор Нийгмийн даатгалын ерөнхий газар оролцож байна. хуралд хүрэлцэн ирсэн нийт зочид, төлөөлөгчдөд УИХ-ын дарга З.Энхболд, Шадар сайд Ц.Оюунбаатар нар мэндчилгээ дэвшүүлснийг холбогдох ажилтнууд хүргүүлэв.

     Гол хэлэлцэх асуудал нь 2015 онд гарсан барилгын салбарын үйлдвэрлэлийн ослын талаарх мэдээллийг танилцуулж, цаашид авах арга хэмжээний талаар, ХАБЭА-н стандарт, норм дүрмийн шинэчлэл, салбарын даатгалын тогтолцоог боловсронгуй болгох мөн өндөр барилгын ХАБЭА-д тавигдах шаардлагыг өндөржүүлэх талаар яригдах юм.

Барилгын үйлдвэрлэлийн чанар, аюулгүй ажиллагаа хариуцсан мэргэжилтэн Б.Батзориг, “Барилга угсралтын аюулгүй байдлыг 100 хувь хангаж барилга чанартай баригддаг. Бид 2012 оноос хойш барилгын ажил эхлэхээс өмнө ХАБЭА-н зөвлөгөөн хийдэг. Өмнөх жилүүдийн зөрчил, алдаа дутагдал юу байсан, цаашид ямар арга хэмжээг авч ажиллах талаар санал, шийдвэрийг гаргах зорилготой юм. Сүүлийн жилүүдэд барилгын осол аваар ерөнхий тоо дүнгээрээ буурч байгаа боловч, хүний ам нас эрсдэх байдал буурахгүй байна. Энэ нь ХАБЭА-н дүрэм журам бол хангалттай байгаа ч хэрэгжилт тааруу байгаатай холбоотой. Осол аваар гарч байгаа газруудад статистик судалгаа хийхэд 50 гаруй мянга нь өндрийн осол байна. Наад зах нь хамгаалалтын торны стандарт байдаггүй. Энэ тухай зөвлөгөөн дээр хэлэлцэнэ.”