Монголбанкны зүгээс ипотекийн санхүүжилтийг 2013 оноос хэрэгжүүлж эхэлсэн нь барилгын салбарыг хөгжүүлэх, дэмжих чухал арга хэмжээ болсон гэж барилгын салбарын хамт олон зүй ёсоор үнэлж, талархаж байдаг.

     Энэхүү бодлого нь зах зээлийн аль ч үед, тухайлбал барилгын салбарыг хамгийн ихээр нэрвэсэн эдийн засгийн хүнд үед ч явуулж ирсний жишээ бол орон сууцны ипотекийн 8 хувийн зээлийг тасралтгүй үргэлжлүүлж байсан, одоо хэвийн явж байна. Эдийн засаг тогтворжих тодхон дохионы нэг болох инфляцийн түвшинтэй уялдуулж ипотекийн 5 хувийн хүүтэй зээл олгох шийдвэр гарч, хэрэгжиж эхлээд байна. Ийнхүү, сүүлийн жилүүдэд хөгжлийн шинэ шатанд гарсан боловч, эдийн засгийн хүндрэлээс үүдэн  эргүүлэн татаж авахад хэцүү болтлоо унасаар байсан барилгын салбарыг аврах, үүгээр дамжуулан улс орныхоо эдийн засгийг сэргээх ихээхэн чухал алхам, улс төрчийн мэргэн ухаан, мэргэжлийн түвшний маш зөв шийдэл, шийдвэрийг Монголбанкны Ерөнхийлөгч Н.Золжаргал гаргалаа.

     Манай Улсад орж ирэх гадаадын хөрөнгө оруулалт хумигдаж, түүнийг дагасан олон бизнес зогсонги байдалд орж, ажлын байр хумигдаж буй энэ цаг үед Монголбанкнаас мөнгөний бодлогын хүрээнд авсан дээрх арга хэмжээ нь барилгын салбарт ажилладаг 100,000 орчим ажиллагсад ажилтайгаа үлдэж, тэдгээрийн ар гэр, мөн өнөөдөр орон сууц худалдан авах шаардлагатай, хүсэлтэй байгаа 100,000 Монгол өрхөд амьдрал, итгэл, боломж бэлэглэсэн үйл явдал боллоо.

БАРИЛГЫН САЛБАРЫН НИЙТ ХАМТ ОЛНЫ ӨМНӨӨС МОНГОЛБАНКНЫ ХАМТ ОЛОНД ТАЛАРХАЛ ИЛЭРХИЙЛЖ, АЖЛЫН ӨНДӨР АМЖИЛТ ХҮСЬЕ.