УИХ-аас Нийслэлийн ерөнхий төлөвлөгөөнд Улаанбаатар хотыг 29 дэд төвтэй байхаар 2013 онд тусгасан. Үүнээс үүдэн уг төсөл хөтөлбөр хэрэгжиж эхлэх эрхзүйн орчин бүрдэж, 29 дэд төвийн есийг нь байгуулахаар болсон билээ. Төслийн нийт санхүүжилт нь 320 сая ам.доллар, үүнээс Засгийн Газар 96 сая ам.долларыг гаргахаар гэрээнд тусгасан бөгөөд үлдсэн санхүүжилтийг Азийн Хөгжлийн Банк, Европын Хөрөнгө Оруулалтын банк, Азийн Хөгжлийн Сангуудаас урт хугацааны хөнгөлөлттэй зээл хэлбэрээр хөрөнгө оруулахаар болсон. Өнөөдөр энэхүү төслийн явцтай Нийслэлийн засаг дарга бөгөөд Улаанбаатар хотын захирагч Э.Бат-үүл танилцахаар эхний ээлжинд баригдаад буй Баянхошуу, Сэлбэ дэд төвүүдтэй танилцав.

         Азийн хөгжлийн банкаас Баянхошуу, Сэлбэ дэд төвүүдийг газар зүйн байрлалаас шалтгаалан хооронд нь авто замаар холбох бүрэн боломжтой мөн хүн амын нягтаршил өндөр хэмээн эхний ээлжинд сонгосон байна. Дэд төвүүдийг байгуулснаар гэр хороололд төрийн үйлчилгээ болон дэд бүтцийн асуудал бүрэн шийдэгдэнэ. Хамгийн гол нь иргэд газар дээрээ байшин барих уу, хэд хэдэн айл өрхөөрөө нийлж орон сууц барих уу гэсэн шийдлээ өөрсдөө гаргах боломжтой болох юм. Э.Бат-Үүл даргын хэлж буйгаар, “Иргэд хэд хэдэн айл өрхөөрөө нийлж, өөрсдөө газар дээрээ хотхон байгуулах боломжтой. Үүний санхүүжилтийг нийслэлээс шийдэж, зураг төслийг нь хүртэл хийж өгөх боложтой гэнэ. Зөвхөн компаниуд орон сууц бариад бизнес хийх бус иргэд бизнес хийх боломж бүрдэж байгаа” хэмээн оршин суугчдад илэрхийлж байлаа.

Дээрх дэд бүтцийн бүтээн байгуулалтад мэргэжил сургалт үйлдвэрлэлийн төв хоёр, цэцэрлэг хоёр, 8.4Мвт хүчин чадал бүхий 5 уурын зуух, хорооллын доторх авто замын сүлжээ, ногоон байгууламж, гэрэлтүүлэг зэрэг ажлууд цогцоороо хийгдэнэ.

Сэлбэ дэд төвийн тухайд 7 буудлын хойд хэсэг буюу Сүхбаатар дүүргийн 14-р хороо, Чингэлтэй дүүргийн 14, 18-р хорооны нийт 158 га талбайг хамарна.
 
“Баянхошуу” дэд төвд Сонгинохайрхан дүүргийн 7, 8, 9, 10, 11, 24, 28 дугаар хорооны нутаг дэвсгэрийн 318, 2 га талбайг хамарч байна.
 
Баянхошуу, Сэлбэ дэд төвүүдийг барихаар төлөвлөсөн талбайд нийт 300 орчим жижиг аж ахуйн нэгж үйл ажиллагаа явуулдаг. Эдгээр аж ахуйн нэгжүүд бүтээн байгуулалтаас болон үйл ажиллагаа нь доголдох, иргэд хашаа руугаа дэд бүтэц оруулах, орчноо сайжруулах зэрэгт зориулж Азийн Хөгжлийн Банк “Хас” банктай хамтран нийт 6 сая долларын бичил санхүүжилт олгохоор болсон байна. Энэ нь дэд төвийн бүтээн байгуулалтын санхүүжилтээс тусдаа хийгдэх санхүүгийн дэмжлэг аж.

Уг бүтээн байгуулалтын ажлын явцад айл өрхүүдийг нүүлгэн шилжүүлэхэд зориулж Баянхошуу, Сэлбэ дэд төвүүдэд тус бүр 50 айлын орон сууц барьж, иргэдийг түр оршин суух байраар хангахаар болсон. Энэхүү 50 айлын орон сууц баригдаж дууссан бөгөөд Нийслэлийн Орон Сууцны Корпорацид хүлээлгэн өгч, зоорийн болон 1-р давхарт хороо, өрхийн эмнэлэг, цагдаагийн хэлтэс зэрэг төрийн анхан шатны байгууллагууд ажиллах гэнэ.

УБ Хотын Гэр Хорооллыг  Хөгжүүлэх, Хөрөнгө Оруулалтыг Дэмжих Хөтөлбөр  /Баянхошуу, Сэлбэ дэд төв/

"Сэлбэ" дэд төвийн түр суурьшуулах байр

"Баянхошуу" дэд төвийн түр суурьшуулах байр

НИТХ-ын төлөөлөгч, “УБ Хотын Гэр Хорооллыг  Хөгжүүлэх, Хөрөнгө Оруулалтыг Дэмжих Хөтөлбөр” төслийн зохицуулагч  Л.Сайнтөгс