Ногоон эрчим хүчийг дэмжих нэгэн алхам болгож Францын засгийн газар ирэх таван жилийн хугацаанд нарны цахилгаан үүсгүүр хавтангаар 1000 км зам тавихаар төлөвлөжээ. Энэ нь тус улсын хүн амын 8 хувь буюу 5 сая хүнийг сэргээгдэх эрчим хүчээр хангах зорилготой аж. Францын “Колас” иргэний браилгын компани энэхүү “Wattway” хавтанг ашиглах санааг өнгөрөгч оны 10-р сард гаргасан байна.  Хүрээлэн буй орчин, эрчим хүчний яамны сайд уг “Эерэг эрчим хүч” төслийг хатуу түлшинд ногдуулдаг татвараас санхүүжүүлэхийг мэдэгдсэн юм.

     Гэхдээ энэ төрлийн технологийг Франц улс анх удаа ашиглаж байгаа хэрэг биш аж. 2014 онд Нидерланд улс нарны эрчим хүч үүсгүүр хавтангаар дугуйн зам тавьсан анхны улс болжээ. Францын Хүрээлэн буй орчин, эрчим хүчний агентлагийн мэдэгдсэнээр 4 метр орчим ийм зам нэг айлын, 1 км зам нь 5000 оршин суугчийн эрчим хүчний хэрэглээг хангах хүчин чадалтай гэнэ. Үүнд халаалт, дулаанд шаардлагатай цахилгааныг тооцож үзээгүй байна. Дээрх 1000 км замыг тавихад 5 жилийн хугацаа шаардлагатай аж.

     Уг хавтан нь поликристаллин силиконы нимгэн хальсыг ашиглан эрчим хүч үүсгэх аж. 7 мм зузаантай судлууд нь 6 тэнхлэгт ачааны машин гээд бүх төрлийн тээврийн хэрэгслийн жинг тэсвэрлэх хүчин чадалтай. “Wattway” хавтанг 1 сая тээврийн хэрэгсэл тогтмол зорчдог тойрогт туршсан туршилт амжилттай болж, замын гадаргуу огт гэмтэж, хөдлөөгүй байна.

     Одоогоор “Wattway” хавтанг суурилуулсан авто замыг хаана тавих нь тодорхойгүй байгаа. Хатуу түлшнээс авах татварын 200-300 сая еврогоор уг төслийг хэрэгжүүлэх юм.