Иргэдийн гэртээ эрүүл, тав тухтай амьдрах нөхцөлийн гол хүчин зүйл болсон орон сууцны барилгын агаар сэлгэлтийн тухай асуудлаар мэргэжилтнүүд илтгэл тавьж, хэлэлцүүлэг өрнүүллээ. “Орон сууцны барилгын агаар сэлгэлтийн системд тохиолдож буй асуудлууд” сэдэвт уг хэлэлцүүлгийг Монголын Барилгын инженерүүдийн холбооны Гүйцэтгэх захирал Б.Цолмон удирдан явуулж, Монгол Улсын Зөвлөх инженерүүд, хөргөлт, халаалт, агааржуулалтын чиглэлээр үйл ажиллагаа явуулж буй зарим компанийн төлөөллүүд оролцож, илтгэл тавьж, сэдвийн дагуу хэлэлцүүлгийг үргэлжлүүллээ.

     Илтгэлийн сэдвүүд нь манай улсад мөрдөгдөж буй агаар сэлгэлтийн норм стандарт, цаашид шинэчлэх шаардлагатай норм, заалтуудын тухай, агаар сэлгэлтийн ердийн системд тохиолдож буй бэрхшээл, зураг төслийн шатанд тохиолдож буй асуудал, угсралт ба ашиглалтын үед тулгардаг хүндрэл гээд олон талын асуудлыг хөндөн ярилцаж, тэдгээрийг шийдвэрлэх гарцын талаар зөвлөлдсөн юм.