Дэлхийн банкнаас уламжлал болгон гаргадаг Монголын эдийн засгийн сарын тойм гарлаа. Үүнд дэлхийн зах зээл дээрх түүхий эдийн идэвхжил саарч, олон улсын санхүүгийн зах зээлийн байдал тогтворгүй байгаа нь манай улсын эдийн засагт сөрөг нөлөө үзүүлэх нь нэмэгдсэн тухай онцлон тэмдэглэжээ. Түүнчлэн орон сууцны ипотекийн хөнгөлөлттэй зээлийн хөтөлбөрийн санхүүжилтийг Монголбанкнаас бус, Засгийн газарт шилжүүлэн төсвийн санхүүжилттэй хөтөлбөр, арга хэмжээнүүдтэй уялдуулан эрэмбэлэх зарчмаар төсвөөр дамжуулан хэрэгжүүлэх хэрэгтэй байгааг уг тоймд онцолсон байна. Ингэхдээ улсын төсөвт дарамт учруулахгүйгээр цаашид тогтвортой үргэлжлүүлэхэд анхаарах хэрэгтэй гэдгийг Дэлхийн Банкнаас анхааруулжээ.