Төрийн болон төрийн бус мэргэжлийн байгууллагууд, мэргэжилтнүүдийн саналыг тусгасан Барилгын тухай хуулийн шинэчилсэн найруулгын төслийг эцэслэн боловсруулж, 9 бүлэг, 50 зүйлтэйгээр батлагдлаа. Тус хуулийн төсөлд барилга байгууламжийг төвөгшлөөс нь шалтгаалан таван ангилалд хувааж, түүнд барилгын үйл ажиллагаа явуулах тусгай зөвшөөрөл олгох, тухайн барилга байгууламжийн барилгын ажилд зөвшөөрөл олгох асуудлыг холбож өгчээ. Түүнчлэн барилгын үйл ажиллагаа эрхлэх иргэн, хуулийн этгээд, төр захиргааны байгууллагад бүртгүүлсэн байх бөгөөд бүртгэлийг цахим хэлбэрээр гүйцэтгэж олон нийтэд ил тод байлгахаар зохицуулсан байна.

     Төрийн байгууллагуудын хүнд суртлыг таслан зогсоох зорилгоор барилгын ажлын зөвшөөрөл олгох явцыг хуулиар нарийвчлан зохицуулж, тодорхой хугацааг тогтоож өгчээ. Үүнд барилгын ажил эхлүүлэх, үргэлжлүүлэх зөвшөөрөл олгох, барилга байгууламжийг ашиглалтад хүлээн авах, барилгын ашиглалтад хяналт тавих үйл ажиллагааг аймаг, нийслэлийн Засаг даргын бүрэн эрхэд хэрэгжүүлэхээр тусгалаа. Ингэснээр барилгын зөвшөөрөл олгох үйл ажиллагааны хугацаа одоо хүчин төгөлдөр мөрдөж буй хуультай харьцуулбал бараг 9 дахин, гарын үсгийн тоог 3.5 дахин багасгасан байхаар зохицуулж буй нь бизнес эрхлэгчдийн үйл ажиллагааг хөнгөвчлөх нэг алхам болно гэж мэргэжилтнүүд үзэж байна.

     Мөн хуулийн төслөөр барилгын үйл ажиллагааны мэргэжлийн оролцогчдын эрх үүргийг тогтоох, даатгалд хамруулах, барилгын салбарын мэргэжилтнийг бүртгэж гэрчилгээ олгох, барилгын компанийг бүртгэх, барилгын хууль тогтоомж зөрчигчдөд хариуцлага тооцох харилцааг зохицуулах зорилго тавьсан байна. Барилгын салбарт төрийн үйлчилгээ үзүүлэхэд баримтлах зарчмыг тодорхойлж, зөвшөөрөл олгодог, бүртгэл хийдэг зэрэг төвлөрүүлсэн эрх мэдлээсээ бүрэн татгалзаж, төрийн бус байгууллага, мэргэжлийн холбоодод гэрээгээр шилжүүлэн гүйцэтгүүлнэ. Мөн хяналтын тогтолцоог хөндлөнгийн олон нийтийн болгох зорилтыг тусган боловсруулжээ.

Энд дарж татаж авна уу.