УИХ-ын ээлжит бус чуулганы үдээс өмнөх хуралдаанаар Үл хөдлөх хөрөнгийн барьцааны тухай хууль болон Иргэний тухай хуульд нэмэлт өөрчлөлт оруулах хуулийн төслийн анхны хэлэлцүүлгийг хийж, гишүүдийн 86 хувь дэмжсэнээр баталсан. Ингэснээр Банкуудын холбооноос түр зогсоох шийдвэр гаргаад байсан ипотекийн зээл хэвийн үргэлжлэх хууль эрх зүйн орчин бүрдсэн гэж болно. Дээрх шийдвэртэй холбоотойгоор Банкуудын холбооны гүйцэтгэх захирал Ж.Үнэнбат сэтгүүлчдийн асуултад хариулт өгсөн байна. УИХ-аар ипотекийн зээлийг хэвийн үргэлжлүүлэх хууль баталсан учраас арилжааны банкууд дотоод журамдаа нэмэлт өөрчлөлт оруулах аж. Орон сууцны найман хувийн хүүтэй зээлийг маргаашнаас олгож эхлэх юм байна. Харин Засгийн газар, Монголбанкнаас таван хувийн хүүтэй зээлийг олгох чиглэл гаргаснаар хэрэгжиж эхэлнэ гэдгийг тэрээр мэдэгдлээ.