Үүрэг хариуцлагийн тогтолцоо гэж байхгүй
Олон улсын Авилгын эсрэг өдрийг угтан АТГ, МҮХАҮТ, Азийн сан хамтран “Бизнес ба авилга” хэлэлцүүлгийг барилга, худалдаа, үйлдвэрлэл үйлчилгээний салбарын төлөөллийг оролцуулан зохион байгууллаа. Хэлэлцүүлэг дээр яригдсан зарим асуудлыг товчоор өгүүлье.
- Төрийн байгууллагын үйл ажиллагаанаас нэлээн хамааралтай байдаг хоёр салбарыг сонгон аваад салбарын хэмжээнд асуудлаа хэлэлцэх хэрэгтэй. Энэ нь илүү үр дүнтэй гэдэг нь АТГ-аас хэрэгжүүлж байгаа бусад салбар руу чиглэсэн үйл ажиллагаанаас харагдаж байна.
- Азийн хөгжлийн сангаас явуулсан бизнесийн орчин дахь авилгын нөхцөл байдлын судалгаанд түшиглэн барилга, үйлдвэрлэл, худалдаа, үйлчилгээний төлөвлөгөө боловсруулахад арга зүйн зөвлөгөөгөөр хангах чиглэлээр ажиллах болно.
- Тусгай зөвшөөрөл авахаас эхлээд улсын комисст бүтээгдэхүүнээ хүлээлгэн өгтлөө авилгын эрсдэлтэй нүүр тулдаг барилгын салбар дахь авилга, ашиг сонирхлын зөрчлөөс урьдчилан сэргийлэх ажлыг цаашид хамтран өрнүүлнэ гэдэгт итгэлтэй байна.
- Ерөнхийдөө авилга нийгмийн хэв маяг болох хандлага ажиглагдаж байна. Үүний үндсэн шалтгаан нь Монгол Улс бүхий л салбарт зах зээлийн нийгмийн үндсэн зарчимд нийцсэн тогтолцоо бүрдүүлж чадахгүй байна. Барилгын салбарт засаглал, хариуцлагын тогтолцоо байхгүй. Өөрөөр хэлбэл маш их эрх мэдлийг төвлөрүүлж байгаа боловч түүнээс үүдэх хариуцлага хүлээлгэдэггүй байна. Жишээ нь, тусгай зөвшөөрөл олгож байгаа хэрнээ тусгай зөвшөөрөл өгсөн компанийхаа өмнөөс хариуцлага хүлээдэггүй. Гарын үсэг зураад барилгыг улсын комисст хүлээж авсан мэргэжлийн хяналтын байцаагч тухайн барилгатай холбоотой асуудал үүсэхэд ямар ч хариуцлага хүлээлэгдэггүй. Зөвхөн инженерүүдийн хувьд хариуцлага яригддаг. Үүрэг хариуцлагийн тогтолцоо гэж байхгүй. Ийм учраас авилгатай тэмцэхийн тулд салбар бүрт тогтолцоогоо зөв болгох юм.