Барилгын салбарын хөгжилд хувь нэмрээ оруулах, хамтын хүчээр бүтээн байгуулалтын ажлуудыг дэмжих зорилгоор НЗДТГазар, Монголын барилгын үндэсний ассоциаци /МБҮА/, “Баярс констракшн” компани хамтран ажиллах санамж бичиг байгууллаа.

     “Улаанбаатар худалдан авалт 2016” бизнес чуулга уулзалтын үеэр байгуулсан уг харилцан ойлголцлын санамж бичигт Нийслэлийн Засаг даргын Хот байгуулалт, хөрөнгө оруулалтын асуудал эрхэлсэн орлогч С.Очирбат, МБҮА-ийн гүйцэтгэх захирал Б.Нэмэхбаатар нар гарын үсэг зурсан юм. Хамтын ажиллагааны хүрээнд Түрээсийн орон сууц хөтөлбөр, угсармал орон сууцны дулаан техникийн нөхцөл шинэчлэл төсөл, орон сууцны цахим мэдээллийн сан байгуулах, хөрөнгө оруулалтын сангийн үйл ажиллагааг дэмжих зэрэг ажлыг хамтран гүйцэтгэх аж.





     Түүнчлэн “Баярс констракшн” компанитай байгуулсан санамж бичгийн хүрээнд Улаанбаатар хотыг 2020 он хүртэл хөжгүүлэх ерөнхий төлөвлөгөөний тодотгол, 2030 оны хөгжлийн чиг хандлагад уялдуулан томоохон төсөл хөтөлбөрүүдэд хөрөнгө оруулалт хийх, бүтээн байгуулалтын шинэ санаачилгуудыг хэрэгжүүлэх, хуучин барилгуудын дулаан алдагдлыг бууруулах, сэргээн засварлах, үндэсний үйлдвэрлэл болон ажлын байрыг дэмжих тал дээр хамтран ажиллахаар болсон байна.