Ногоон хөгжил, ногоон эдийн засаг нь зөвхөн байгаль хамгаалах тухай асуудал биш юм. Энэ нь хүн төрөлхтөн, түүний хойч үеийнхний амьдрах орчныг хадгалах, хамгаалах тухай юм. Хүн төрөлхтөн бид Дэлхий гараг гэдэг ганц гэртэй. Дэлхийн хүн ам, эдийн засгийн  хурдацтай өсөлт үүнтэй зэрэгцэн өсөн нэмэгдэж буй хязгааргүй хэрэглээ, хэрэгцээг урт удаан хугацаанд тогтвортойгоор хангах байгалийн тийм их баялаг нөөц дэлхий гарагт байхгүй. Эрүүл орчин, үзэсгэлэнт байгаль, цэвэр агаар, цэнгэг ус, энэ бүгдийг хойч үедээ үлдээх, хүртэх хувийг хадгалан өвлүүлэх нь та бидний хариуцлага, үүрэг билээ.

     “Бьюлдингс Текноложи” ХХК нь Герман улсын “BSD Energy” компанитай хамтран “Ариг” банкны Хан-Уул дүүрэг дэх Дэмжих нэгжийн барилгын нарны цахилгаан эрчим хүчний (ЦЭХ) үүсгүүрийн төслийг амжилттай хэрэгжүүлж, 2015 оны 7-р сард ашиглалтад хүлээлгэн өгсөн билээ.





     Энэ системийн бүх тоног төхөөрөмжийг Герман улсад үйлдвэрлэсэн бөгөөд Solon SE брэндийн 250 Вт хүчин чадалтай 42 ширхэг нарны цахилгаан үүсгүүрийн хавтан, SMA брэндийн “Sunny boy” 10000 чадлын хувиргагч, ухаалаг удирдлагын төхөөрөмжөөс бүрдэнэ. Системийн нийт хүчин чадал нь 10,5 кВт*пик. Төслийн нийт өртөг 86,147 сая төгрөг, нөхөх хугацаа нь 11 жил бөгөөд энэ нь 25 жилийн турш найдвартай ажиллана.

     Уг системийн тооцоог “Бьюлдингс Текноложи” компанийн цахилгааны инженер М.Оргил, Герман улсын иргэн  Бернхардт Шульте-Доингхаус нар PV-Simulation 3D программ дээр хийсэн. Энэхүү программ нь заасан талбай дээр угсарч болох хавтангийн тоо, хүчин чадал, чадлын хувиргагч, хавтангийн байрлал, түүний өнцөг, сүүдэр гэх мэт бүх нарийн тооцоог хийдэг бөгөөд программын өөрийн санд байх тоног төхөөрөмжүүдээс сонголт хийх боломжтой. Тус программын санд манай улсын нийт нутаг дэвсгэрийн цаг уур, нарны цацрагийн мэдээлэл байдаг учир сонгосон нарны систем нь жилд хэдэн кВт эрчим хүч үйлдвэрлэдэг гэх мэт тооцоог бодитойгоор гаргаж, график зураглал, тоон мэдээллийн байдлаар хүснэгтэлнэ.


 
    “Бьюлдингс Текноложи” компанийн суурилуулсан нарны ЦЭХ-ний үүсгүүрийн системийн ажиллагааг интернэтээр дамжуулан дэлхийн аль ч өнцгөөс хянах боломжтой. Тухайн үед хэдэн кВт ЦЭХ үйлдвэрлэж байгаа, ашиглалтад өгснөөс хойш ямар хэмжээний ЦЭХ үйлдвэрлэсэн мэт үзүүлэлтүүдийг графикийн дүрсэлээр, тоон заалтаар харж болно.



    Тус систем нь ашиглалтад орсон цагаас эхлэн нэг ч тасалдалгүй найдвартай ажиллаж, энэ хугацаанд 8000 гаруй кВт*ц буюу 1,1 сая төгрөгийн ЦЭХ үйлдвэрлээд “Ариг” банкны дата төвийг найдвартай ЦЭХ-ээр хангаж байгаа юм. 

      Угсралтын ажлыг “BSD Energy” компанийн захирал Бернхардт Шульте-Доингхаус удирдан манай компанийн инженер техникийн 6 ажилтан ердөө 2 хоногийн дотор гүйцэтгэсэн.



“Бьюлдингс Текноложи” компанийн цахилгааны инженер М.Оргил, Герман улсын иргэн Бернхардт Шульте-Доингхаус нар

Бернхардт Шульте-Доингхаус: Бидний зорилго бол PV Monitoring system буюу PV хянах системээр барилгын цахилгаан ачааллыг бүхэлд нь хянах, оновчлоход оршино. Үүгээр бид барилгын тухайн цагийн ачааллыг болон огт хэрэглээгүй, ялангуяа шөнийн цагийн ачааллыг хялбархан тодорхойлно. Хавтгай дээвэртэй барилгад уг системийг суурилуулахад хамгийн хялбар бөгөөд Улаанбаатар хотын ихэнх барилга ийм дээвэртэй билээ. Хотын гадна талд баригдах хувийн сууцнуудад эдгээр системийг суурилуулснаар Монголын байнгын өндөр цацраг бүхий нарыг ашиглан хүрээлэн байгаа орчиндоо хоргүй ая тухтай амьдрах нөхцөл бүрдэнэ.

“Ариг” банкны захирал Д. Төмөрхүү: Ариг Банкны хувьд байгаль орчинд учруулж буй сөрөг нөлөөллийг хязгаарлах, Улаанбаатар хотын агаарын бохирдлыг бууруулах, хүрэн нүүрсээр үйлдвэрлэгдэж буй ЦЭХ-ний хэрэглээг багасгах зорилгоор Герман улсын “BSD Energy” болон “BT” компаниудтай хамтран төслийг хэрэгжүүлсэн. 2015 оны 7-р сард Уг төслийг Ариг банк, “Бьюлдингс Текноложи”, “BSD-Energy” компаниуд санаачилж, сэргээгдэх эрчим хүчний хэрэглээг барилга байгууламжид нэвтрүүлэхэд гол зорилгоо чиглүүлсэн. Манай банк уг жишиг төслийг өөрийн хөрөнгөөр санхүүжүүлсэн. Цаашид сэргээгдэх эрчим хүч нэвтрүүлэх төслүүдэд зориулсан санхүүжилтийн загвар бий болгож, хэрэгжүүлнэ.

Жишиг төслийн хувьд нарны ЦЭХ  үүсгүүрийг барилгынхаа цахилгааны сүлжээнд холбосноор цахилгааны хэрэгцээнийхээ 50-65%-ийг сэргээгдэх эрчим хүчээр хангаж байна. Мөн цахилгааны ухаалаг удирдлагын систем суурилуулсан нь цахилгааны ашиггүй хэрэглээг 20 хувиар бууруулах боломжийг олгож байгаа юм. Цаашлаад банкны дата төвийн үйл ажиллагааг цахилгааны тасралтгүй эх үүсвэрээр хангах гэх мэт чухал ач холбогдолтой юм.

"Ариг” Банкны хамт олон энэ төрлийн шинэчлэлүүдийг үйл ажиллагаанд идэвхтэй нэвтрүүлэн ажилладгаас гадна харилцагч болон түнш байгууллагуудтай хуримтлуулсан туршлагаа хуваалцахад нэн таатай байх болно.