Барилга, хот байгуулалтын яамнаас санаачлан Түрээсийн орон сууц хөтөлбөрийг хэрэгжүүлэн, нийт 929 орон сууцыг хамруулах шийдвэр гаргаж, холбогдох журмыг батлаад байгаа. Тэгвэл уг түрээсийн орон сууцанд орох хүсэлтэй иргэдийг сонгох ажлыг Төрийн орон сууцны корпораци зохион байгуулах юм. Тэгвэл тус корпорациас урьд нь “Буянт-Ухаа” хороололд байр авах иргэдийг сонгон шалгаруулж байсан туршлагадаа үндэслэн мөн сугалаагаар иргэдийг сонгохоор болжээ. Судалгаагаар нийслэл хотод энэ хөтөлбөрт хамрагдах хүсэлтэй 27 мянга орчим иргэн байгаа гэсэн дүн гарчээ. Эдгээр иргэдийг бүртгэхэд 14 хоног шаардагдах ч, тэдгээрээс 350 өрхийг л сугалаагаар тодруулах юм байна.

     Түрээсийн орон сууцны төлбөр нь өрхийн сарын орлогын 25 хувьтай тэнцэхүйц буюу хоёр өрөө байр нь 280 мянган төгрөгийн түрээсийн төлбөртэй байх шийдвэр гарсан. Тэгэхээр хөтөлбөрт хамрагдах тухайн айлын сарын орлого 1,120,000 төгрөгөөс доошгүй байхаас гадна гэр хороололд амьдардаг, анх удаа орон сууцанд орох гэж буй иргэн байх ёстой гэсэн үндсэн шалгуурууд тавигдаж байгаа.

     Түрээсийн гэрээг таван жилээр хийхийг журамд заасан бөгөөд тухайн айлын орон сууцандаа хандаж буй байдлаас шалтгаалан цаашид сунгах эсэхийг шийдвэрлэх аж. Хөгжлийн бэрхшээлтэй, ахмад настай иргэдийн өрхийн сарын орлого нь дээрх шалгуурт хүрэхгүй тохиолдол гарч байгаа боловч Статистикийн ерөнхий газраас явуулдаг судалгаагаар Улаанбаатар хотод өрхийн сарын дундаж орлого 1,130,000 төгрөг байна гэсэн дүнг гаргажээ. Тиймээс энэ судалгааны дүнг үндэслэн шалгуур үзүүлэлтийг тогтоосон гэдгийг албаны хүмүүс тайлбарлаж байгаа юм.